Raiffeisen Bank Shqipëri konfirmon zgjidhjen e problematikës tekniko-operative në pasqyrimin e disa transaksioneve

Raiffeisen Bank Shqipëri, në një deklaratë për mediat, informon se gjatë datës 4 tetor 2026 është evidentuar një problematikë tekniko-operative në procesimin dhe pasqyrimin e një numri të kufizuar transaksionesh me karta, për një periudhë të kufizuar kohore.

Si pasojë, disa transaksione të kryera me karta mund të jenë pasqyruar dy herë në llogaritë e klientëve.

Menjëherë pas identifikimit të problematikës, Banka aktivizoi procedurat përkatëse të korrigjimit dhe kreu verifikimet e nevojshme për të garantuar saktësinë e të dhënave dhe të gjendjeve të llogarive të klientëve.

Transaksionet e prekura janë verifikuar dhe procesi i korrigjimit është përfunduar. Aktualisht, llogaritë e klientëve pasqyrojnë saktë transaksionet e kryera dhe gjendjen reale të fondeve.  

“Gjithashtu duam të theksojmë se nga verifikimet e kryera nuk është evidentuar asnjë akses i paautorizuar në sistemet e Bankës, komprometim i të dhënave të klientëve apo incident i sigurisë kibernetike.

Problematika ishte e natyrës tekniko-operative dhe nuk lidhet me akses të paautorizuar apo ndërhyrje në sistemet e Bankës.

Banka ka ndërmarrë gjithashtu masa parandaluese dhe korrigjuese për të reduktuar mundësinë e përsëritjes së një situate të ngjashme.

Raiffeisen Bank Shqipëri i kërkon ndjesë klientëve për shqetësimin e krijuar. Besimi i klientëve mbetet prioriteti ynë dhe ne vlerësojmë mirëkuptimin dhe mirëbesimin e tyre të vazhdueshëm.

Banka do të ndjekë ligjërisht çdo rast të publikimit ose shpërndarje të informacionit të pavërtetë në emër të Raiffeisen Bank dhe do të ndërmarrë të gjitha veprimet ligjore për mbrojtjen e reputacionit dhe interesave të saj duke mbrojtur kështu edhe interesat e klientëve që na kanë besuar fondet e tyre”, thuhet në deklaratën e Raiffeisen Bank Shqipëri.