Spalletti vlerëson Zhegrovën: Nëse forcohet fizikisht, do të bëhet një yll
Luciano Spalletti ka folur me vlerësim për Edon Zhegrovën, duke nënvizuar potencialin e madh që sheh te sulmuesi i Kosovës dhe Juventusit.
Në një intervistë të dhënë për “Tuttosport”, trajneri italian është ndalur te cilësitë e Zhegrovës, veçanërisht te aftësia e tij në duelet një kundër një dhe te talenti teknik.
“Duhet ta keni kujdes Edon Zhegrovën. Nëse forcohet edhe pak fizikisht, do të bëhet një yll!”, është shprehur Spalletti, sipas deklaratës së cituar nga “Tuttosport”.
Zhegrova ka treguar edhe këtë sezon se zotëron një repertor të veçantë teknik. Me Juventusin, ai ka spikatur sidomos për aftësinë për të eliminuar kundërshtarët në hapësira të ngushta, ndërsa në sfidën ndaj Sassuolos realizoi një dopietë pasi u aktivizua nga stoli.
Spalletti ka theksuar më herët se Zhegrova është “i pakapshëm dhe i paparashikueshëm” kur nis aksionet një kundër një, por ka kërkuar prej tij edhe më shumë vazhdimësi dhe kontribut në fazën pa top.
Për futbollistin kosovar, fjalët e trajnerit italian janë një tjetër konfirmim i potencialit që ai posedon, ndërsa sfida e radhës mbetet që këtë talent ta shndërrojë në vazhdimësi dhe protagonizëm të rregullt.
