Francë/ Protestojnë për gjendjen e shkollave, nxënësit përplasen me policinë, një 15 vjeçar humb dorën

Një djalë 15-vjeçar humbi dorën gjatë një përplasjeje mes policisë dhe protestuesve pranë një shkolle në Francë, kanë bërë të ditur autoritetet, ndërsa protestat e nxënësve vazhdojnë në mbarë vendin.

Incidenti, i cilësuar si “shumë i rëndë”, ndodhi të hënën në mëngjes në qytetin Lens, në verilindje të Francës, sipas prefektit të Pas-de-Calais, François-Xavier Lauch.

“Jeta e nxënësit nuk është në rrezik”, tha ai, duke shtuar se adoleshenti u transportua “shumë shpejt” në një spital pranë zonës.

Rreth 500 shkolla në të gjithë Francën ishin pjesërisht ose plotësisht të mbyllura të hënën për shkak të protestave të nxënësve lidhur me gjendjen e ndërtesave shkollore dhe mungesën e personelit, protesta që ditët e fundit kanë sjellë edhe përplasje me policinë.

Mediat franceze kanë raportime të ndryshme mbi mënyrën se si i riu pësoi dëmtimin.

Gazeta rajonale La Voix du Nord raportoi se ai humbi dorën pasi mori nga toka një granatë trullosëse të përdorur nga policia.

I pyetur për ngjarjen, kryetari i Bashkisë së Lens, Sylvain Robert, tha se rrethanat ende duhet të sqarohen.

“Ashtu si ju dhe shumë të tjerë, kam parë disa video që tregojnë pasojat e ngjarjes. Por nuk kam parë se si ishte organizuar operacioni, qoftë nga policia apo nga nxënësit”, deklaroi ai për mediat franceze.

Një prokuror rajonal tha se ngjarja do të hetohet nga Inspektorati i Përgjithshëm i Policisë Kombëtare (IGPN), organi që mbikëqyr veprimtarinë e policisë franceze, “në mënyrë që të zbardhen plotësisht rrethanat e asaj që ka ndodhur”.

Sipas prefektit, incidenti ndodhi pranë shkollës së mesme Auguste Béhal.

Lauch deklaroi se jashtë shkollës ishte mbledhur një grup më i madh nxënësish se në ditët e mëparshme.

“Në fillim të mëngjesit, ata hodhën sende të ndryshme ndaj efektivëve të policisë që ndodheshin fillimisht në vendngjarje. Kur them sende, kam parasysh gurë, fishekzjarre dhe mortaja artizanale”, tha ai për mediat franceze.

“Drejtori ndërdepartamental i Policisë Kombëtare, natyrisht me miratimin tim, dha udhëzime për vendosjen këtu të një njësie të policisë së ndërhyrjes së shpejtë (CRS) për të ruajtur rendin, dhe pikërisht në këtë kontekst ndodhi ngjarja.”

Shkolla publikoi një njoftim të hënën në mëngjes, ku thuhej:

“Në dritën e ngjarjeve që ndodhën këtë mëngjes dhe për të garantuar sigurinë e të gjithë komunitetit shkollor, institucioni do të kalojë në mësim në distancë duke filluar nga ky moment.

Gjithashtu, për të mbështetur nxënësit dhe stafin gjatë kësaj periudhe, në shkollë është ngritur një njësi dëgjimi dhe mbështetjeje psikologjike.” /BBC/