26% e bizneseve shesin online, Shqipëria e dyta në Ballkan pas Serbisë

Bizneset shqiptare po e përdorin gjithnjë e më shumë internetin si kanal shitjeje, duke e çuar Shqipërinë në vendin e dytë në Ballkanin Perëndimor. Në një kohë kur tregtia online ka rënë në shumicën e ekonomive të rajonit, Shqipëria ka shënuar rritje të ndjeshme gjatë vitit 2025.

Tregtia online po fiton terren te bizneset shqiptare. Në vitin 2025, 26% e kompanive në Shqipëri, kanë shitur mallra ose shërbime përmes internetit, kundrejt 19% një vit më parë. Në numër, vitin e kaluar ishin rreth 36 mije biznese që mbajtën te aktivizuar shitjet nga platformat në internet.

Shifrat e nxjerra nga Këshillit i Bashkëpunimit Rajonal e rendisin vendin tonë të dytin në Ballkanin Perëndimor, pas Serbisë, ku shitjet online kryhen nga 27% e bizneseve. Rritja shqiptare vjen në një kohë kur tendenca rajonale është në drejtim të kundërt. Mesatarisht, vetëm 20% e bizneseve në gjashtë ekonomitë e Ballkanit Perëndimor shesin online. Pas Shqipërisë renditet Maqedonia e Veriut me 23%, ndërsa Mali i Zi me 18%, Kosova me 13% dhe Bosnjë-Hercegovina me rreth 10%.

Ndryshimi më i fortë shihet në krahasimin me një vit më parë. Në 2024-n, Shqipëria ishte 8 pikë përqindjeje nën mesataren rajonale. Një vit më pas, situata është përmbysur: vendi është 6 pikë mbi mesataren e Ballkanit Perëndimor. Rritje kanë shënuar edhe Serbia dhe Maqedonia e Veriut, ndërsa rënia më e theksuar është regjistruar në Bosnjë-Hercegovinë dhe Kosovë. Të dhënat tregojnë kështu se bizneset shqiptare po e shfrytëzojnë gjithnjë e më shumë kanalin online për të zgjeruar shitjet dhe për të mbajtur pranë konsumatorët.