Mediat sociale, shkak për depresion dhe obezitet tek adoleshentët

Përdorimi i tepërt i ekraneve po lidhet gjithnjë e më shumë me probleme të shëndetit te fëmijët dhe adoleshentët.

Analiza e 121 studimeve nga e gjithë bota ka zbuluar se rreth 20 % e rasteve të depresionit dhe 15% e rasteve të obezitetit tek të rinjtë lidhen me kohën e tepërt para ekranit.

Studimi, i publikuar në revistën mjekësore The Lancet, e konsideron përdorimin problematik të mediave digjitale një çështje që tashmë prek shëndetin publik.

Ekspertët theksojnë se rreziku nuk është i njëjtë për të gjithë fëmijët. Më të ekspozuar janë ata që kanë probleme të shëndetit mendor, më pak mbështetje sociale jashtë internetit dhe më pak aftësi për përdorimin e sigurt të teknologjisë.

Por ekspertët nënvizojnë se teknologjia nuk është vetëm negative. E përdorur në mënyrë të kontrolluar, ajo mund t’i ndihmojë fëmijët të mësojnë, të krijojnë, të lidhen me të tjerët dhe të zhvillojnë interesa të reja.

Në vend të ndalimit total, ekspertët rekomandojnë përdorim me qëllim, mbikëqyrje dhe më shumë aktivitete jashtë ekranit.