Reforma territorial! 15 bashki shkrihen, cilat do jenë 6 qytetet e reja! Çfarë ndryshon në hartën e re

Nëse reforma e re administrativo-territoriale merr 84 votat e nevojshme në seancën plenare të së enjtes, Shqipëria do të kalojë nga 61 në 46 bashki. Drafti i miratuar në Komisionin e Ligjeve parashikon shkrirjen e 15 bashkive aktuale dhe bashkimin e tyre me bashki më të mëdha, ndërsa qarqet nuk ndryshojnë.

Në hartën e re parashikohet gjithashtu një riorganizim i qendrave urbane, me 71 qytete përbërëse dhe 387 njësi administrative. Gjatë shqyrtimit në Komisionin e Ligjeve janë shtuar edhe gjashtë zona që marrin statusin e qytetit.

15 bashkitë që humbasin statusin aktual

Sipas draftit, bashkitë që shkrihen dhe bashkohen me njësi të tjera janë:

1. Fushë-Arrëzi → me Bashkinë Pukë
2. Klosi → me Bashkinë Mat
3. Rrogozhina → me Bashkinë Kavajë
4. Dimali → me Bashkinë Berat
5. Poliçani → me Bashkinë Berat
6. Patosi → me Bashkinë Fier
7. Divjaka → me Bashkinë Lushnjë
8. Selenica → me Bashkinë Vlorë
9. Maliqi → me Bashkinë Korçë
10. Këlcyra → me Bashkinë Përmet
11. Memaliaj → me Bashkinë Tepelenë
12. Libohova → me Bashkinë Gjirokastër
13. Cërriku → me Bashkinë Elbasan
14. Belshi → me Bashkinë Elbasan
15. Përrenjasi → me Bashkinë Librazhd.

Gjashtë zonat që marrin statusin e qytetit

Ndryshimi tjetër i parashikuar në hartën e re lidhet me klasifikimin e disa qendrave urbane. Nëse reforma miratohet, statusin e qytetit pritet ta marrin:

1. Kastrati, në Bashkinë Malësi e Madhe
2. Bushati, në Bashkinë Vau i Dejës
3. Ulza, në Bashkinë Mat
4. Krasta, në Bashkinë Bulqizë
5. Miloti, në Bashkinë Kurbin
6. Golemi, në Bashkinë Kavajë.

Kështu, në Bashkinë Kurbin do të përfshihen qytetet Laç, Mamurras dhe Milot, ndërsa në Bashkinë Kavajë, pas bashkimit me Rrogozhinën, do të jenë Kavaja, Rrogozhina dhe Golemi.

Në nivelin e qeverisjes vendore, bashkia mbetet njësia kryesore e vetëqeverisjes. Reforma synon një strukturë me 46 bashki, 71 qytete dhe 387 njësi administrative, ndërsa qarqet nuk preken nga ndryshimet e propozuara.

Projektligji tashmë është miratuar në Komisionin e Ligjeve dhe pritet të kalojë për votim në seancën plenare të 8 tetorit. Për miratimin e tij kërkohen 84 vota.