Mbyllet protesta për Specialen në Prishtinë, Policia gaz lotsjellës e topa uji kundër protestuesve! 17 të lënduar, 6 prej tyre policë, arrestohet nipi i Thaçit! PDK: VV të votojë ligjin (VIDEO ＋ FOTO)

Ka përfunduar pak para mesnate protesta para Kuvendit të Kosovës për ndryshimet në Ligjin për Dhomat e Specializuara. Pas tensioneve dhe përplasjeve me Policinë, protestuesit janë shpërndarë qetësisht, por do të rikthehen në shesh nesër në orën 09:00.

Protesta nisi që në mëngjes me kërkesën që ndryshimet për Specialen, të miratuara në parim nga Kuvendi, të kalonin edhe në leximin e dytë dhe përfundimtar. Situata u përshkallëzua pasi deputetët e Vetëvendosjes u larguan dhe votimi nuk u zhvillua.

Gjatë përplasjeve, protestuesit hodhën mjete piroteknike dhe shishe qelqi, ndërsa Policia përdori gaz lotsjellës dhe topa uji për t'i larguar nga zona e Kuvendit.

Protesta do të rinisë të martën në orën 09:00, me të njëjtën kërkesë: votimin përfundimtar të ndryshimeve në Ligjin për Dhomat e Specializuara.

Protesta për ndryshimet në Ligjin për Dhomat e Specializuara pritet të vijojë edhe të martën në Prishtinë. Organizata e Veteranëve të Luftës së UÇK-së (OVL-UÇK) u ka bërë thirrje qytetarëve dhe kategorive të dala nga lufta që të mblidhen sërish në shesh që në mëngjes.

"Popull i dashur. Kategori të dala nga lufta e UÇK-së. Nesër, mëngjesi duhet të na gjejë të gjithëve në sheshin e Prishtinës. Të bashkuar dhe me dinjitet, për të mbrojtur atë që është e jona dhe për të dëshmuar se UÇK-ja na bashkon", thuhet në reagimin e OVL-UÇK-së.

Protestuesit vijojnë të qëndrojnë pranë Kuvendit edhe në orët e vona të mbrëmjes, ndërsa situata është qetësuar

Policia e Kosovës tha se gjashtë policë u lënduan dhe 11 qytetarë kërkuan ndihmë mjekësore gjatë protestës pranë Kuvendit dhe Qeverisë mbrëmjen e 5 tetorit.

Në një njoftim, policia tha se tre protestues u shoqëruan në komisariat. Veprimet e mëtejme ndaj tyre do të ndërmerren në koordinim me organet e drejtësisë.

Policia konfirmoi përdorimin e gazit lotsjellës dhe topit të ujit, duke thënë se ndërhyri ndaj protestuesve që hodhën mjete piroteknike dhe sende të forta drejt institucioneve dhe zyrtarëve policorë.

Sipas njoftimit, protesta po vazhdonte e qetë në orët e vona.

Kreu i PDK-së, Bedri Hamza, i është bashkuar protestës para Kuvendit të Kosovës, disa orë pas takimit pa marrëveshje me Albin Kurtin për votimin e ndryshimeve në Ligjin për Dhomat e Specializuara.

"Ligji është domosdoshmëri. Nuk ka asnjë arsye që ligji të mos aprovohet në dy lexime. Ligji nuk ka të bëjë me një parti politike, ka të bëjë me një çështje që i kalon përmasat e një partie", tha Hamza.

Ai shtoi se ligji "ka të bëjë me mbrojtjen e të kaluarës, të historisë, tash edhe të ardhmes".

Protestuesit kërkojnë që Kuvendi të votojë në lexim të dytë ndryshimet për Specialen, të cilat më herët u miratuan në parim me 91 vota pro.

Protestuesit nuk kanë ndërmend të shpërndahen mbrëmjen e së hënës në Prishtinë. Pas disa orësh përplasjesh me Policinë dhe pasi u shtynë larg ndërtesave të institucioneve, ata janë rikthyer në numër të madh në sheshin "Skënderbeu", pranë Qeverisë dhe Kuvendit të Kosovës, duke vijuar kërkesën për votimin përfundimtar të ndryshimeve në Ligjin për Dhomat e Specializuara.

Bashkë me protestuesit janë kthyer pranë Kuvendit edhe deputetë të PDK-së dhe AAK-së, të cilët po kërkojnë që Vetëvendosje të rikthehet në sallë dhe projektligji të hidhet në votim në lexim të dytë.

Mes protestuesve dhe ndërtesave të Qeverisë e Kuvendit është vendosur një numër i madh efektivësh. Policia ka krijuar një kordon para hyrjes në perimetrin e dy institucioneve, por për momentin nuk po tenton ta shpërndajë sërish turmën.

Situata është qetësuar krahasuar me orët e mëparshme, kur protestuesit u përleshën me Policinë dhe u larguan nga "Skënderbeu" përmes sheshit "Nënë Tereza" deri në "Zahir Pajaziti". Policia përdori gaz lotsjellës, sprej dhe topa uji, ndërsa protestuesit hodhën mjete piroteknike dhe shishe.

Përplasjet lanë 12 persona që kërkuan ndihmë mjekësore, 11 civilë dhe një polic. Të gjithë janë liruar nga spitali dhe nuk janë në rrezik për jetën.

Shefi i Qendrës Emergjente në Qendrën Klinike Universitare të Kosovës, Naser Syla, i tha Radios Evropa e Lirë se 12 persona – një polic dhe 11 civilë – kanë kërkuar ndihmë mjekësore nga protesta e sotme.

Sipas tij, kërkesat për trajtim mjekësor kishin të bënin kryesisht me gazin lotsjellës.

Tre prej të lënduarve, sipas Sylës pësuan “plagë prerëse në pjesë të ndryshme të trupit”.

Sipas tij, të gjithë pacientët e trajtuar janë liruar nga spitali pasi nuk janë në rrezik për jetën.

Nipi i ish-presidentit të Kosovës, Hashim Thaçi, është arrestuar mbrëmjen e sotme gjatë protestës para Kuvendit të Kosovës, ku prej orësh po kërkohet votimi përfundimtar i ndryshimeve në Ligjin për Dhomat e Specializuara.

Sipas Klan Kosovës, ai foli para kamerave edhe pasi ishte vendosur në pranga, duke komentuar ndërhyrjen e Policisë dhe duke bërë thirrje për pjesëmarrje në protestë.

"Shoku nuk vlen në këtë regjim. Është veteran, veterani po e arreston një person që i doli ballë", u shpreh ai teksa ndodhej i prangosur.

Arrestimi vjen pas përshkallëzimit të situatës rreth Kuvendit. Protestuesit janë përplasur me Policinë, ndërsa kjo e fundit ka përdorur gaz lotsjellës dhe ka dislokuar kamionë me ujë.

Tensione para Kuvendit të Kosovës, ndërsa votimi për ndryshimet në Ligjin për Dhomat e Specializuara ka ngecur në përplasjen mes Lëvizjes Vetëvendosje dhe PDK-së për atë që duhet të ndodhë më parë: votimi përfundimtar i ligjit apo zgjedhja e presidentit të ri.

Protestuesit e mbledhur rreth Kuvendit kanë penguar deputetin e Vetëvendosjes, Fahrush Rexhepi, që të largohej nga oborri i institucionit. Disa prej tyre e kapën me forcë dhe e 'fluturuan mbi gardhin e vendosur nga Policia, duke e kthyer brenda hapësirës së Kuvendit.

Protestuesit paralajmëruan se nuk do të lejojnë deputetët të largohen pa u votuar në lexim të dytë ndryshimet në Ligjin për Dhomat e Specializuara.

Më herët, ata penguan të largohej edhe ish-zëvendëskryeministri Besnik Bislimi, i cili nuk është deputet. Bislimi u kthye nën përcjelljen e Policisë pasi disa protestues e kapën për krahu.

Organizatori i protestës, Çlirim Haziri, ka bërë thirrje që qytetarët t'i bashkohen protestës, ndërsa ka deklaruar se deputetët "mund të dalin vetëm mbi trupat tanë".

Tensionet vijnë pasi Kuvendi miratoi në parim ndryshimet në Ligjin për Dhomat e Specializuara, por votimi përfundimtar në lexim të dytë është përplasur me çështjen e zgjedhjes së presidentit.

LVV kërkon që Kuvendi të zgjedhë fillimisht presidentin, pasi afati kushtetues përfundon më 6 tetor, dhe më pas të votojë në lexim të dytë ndryshimet për Specialen. PDK-ja kërkon të kundërtën: fillimisht votimin përfundimtar të ligjit dhe më pas zgjedhjen e presidentit.

Për të gjetur një marrëveshje, Albin Kurti dhe kreu i PDK-së, Bedri Hamza, zhvilluan një takim, i cili përfundoi pa ndonjë njoftim nëse palët kanë arritur dakordësi. Pas takimit është mbledhur grupi parlamentar i PDK-së.

Instituti i Kosovës për Drejtësi reagoi ndërkohë ndaj incidenteve, duke u kërkuar protestuesve të mos pengojnë fizikisht deputetët. Sipas IKD-së, protesta dhe presioni politik nuk mund të shndërrohen në presion fizik ndaj të zgjedhurve.