Dakota Johnson ka festuar 37-vjetorin më 4 tetor në New York me një look që vazhdon një nga tendencat më të dukshme të momentit, veshjet transparente dhe lingerie-as-outerwear.
Për darkën e ditëlindjes në Via Carota, aktorja zgjodhi një fustan të gjatë të zi me dantellë florale dhe pjesë transparente, përmes të cilave dukeshin të brendshmet e zeza. Look-un e kombinoi me taka të zeza me rripa dhe një xhaketë të shkurtër lëkure me detaje furry në mëngë.
Johnson e kompletoi pamjen me flokët e mbledhur në mënyrë të çrregullt dhe një kapëse të kuqe, varëse të holla argjendi, një çantë të vogël me shkëlqim dhe manikyr të kuq. Rezultati ishte një kombinim mes dantellës romantike dhe elementeve më të forta të lëkurës.
Ditëlindja erdhi menjëherë pas një tjetër momenti të rëndësishëm për aktoren. Një ditë më parë, më 3 tetor, ajo drejtoi “Saturday Night Live” për herë të tretë. Për monologun zgjodhi një fustan të kuq latex Versace nga arkivat e vitit 2013 dhe një varëse diamanti Roberto Coin me vlerë 124,000 dollarë. Dy paraqitjet ishin shumë të ndryshme, por kishin një element të përbashkët: Johnson po largohet përkohësisht nga minimalizmi që zakonisht karakterizon stilin e saj dhe po eksperimenton me veshje shumë më të guximshme.
