Këshilltarët kryesorë të sigurisë kombëtare të presidentit amerikan Donald Trump u mblodhën të premten në Camp David, në një takim të pazakontë që zgjati disa orë dhe ku u diskutuan hapat e ardhshëm lidhur me luftën me Iranin dhe konfliktin mes Arabisë Saudite dhe Houthive në Jemen, raportojnë zyrtarë amerikanë për Axios.
Takimi nuk ishte njoftuar paraprakisht nga administrata Trump. Sipas burimeve, një takim i ngjashëm në Camp David ishte zhvilluar në qershor të vitit 2025, pak ditë përpara se Izraeli të niste luftën kundër Iranit.
Sekretari amerikan i Shtetit, Marco Rubio, konfirmoi zhvillimin e takimit, duke thënë se administrata zhvillon rregullisht diskutime për planifikimin strategjik afatgjatë. Sipas tij, Camp David ofroi një mjedis me më pak shpërqendrime për këto diskutime.
Takimi u drejtua nga zv.presidenti JD Vance. Në të morën pjesë gjithashtu Sekretari i Shtetit Marco Rubio, Sekretari i Mbrojtjes Pete Hegseth, i dërguari i Shtëpisë së Bardhë Steve Witkoff, drejtori i CIA-s John Ratcliffe, kreu i Shtabit të Përbashkët të Ushtrisë amerikane, gjenerali Dan Caine, si dhe Sekretari i Thesarit Scott Bessent.
Një zyrtar amerikan tha se gjatë takimit “gjërat u vendosën ose të paktën u diskutuan thellësisht”, duke iu referuar krizës në Lindjen e Mesme. Shtëpia e Bardhë nuk komentoi mbi përmbajtjen e diskutimeve.
Trump përballet me vendime të rëndësishme
Takimi vjen në një moment kur negociatat me Iranin kanë ngecur dhe Trump po shqyrton mundësinë e rifillimit të operacioneve të mëdha luftarake ndaj Iranit.
“Tani duhet të marr një vendim: ose Irani nënshkruan marrëveshjen, ose nuk do të ekzistojë më”, deklaroi Trump të enjten, sipas Axios.
Paralelisht, presidentit amerikan po i kërkohet të mbështesë ofensivën e planifikuar të Arabisë Saudite kundër Houthive në Jemen. Riadi po i kërkon SHBA-ve të kryejë sulme ajrore ndaj pozicioneve të Houthive, ndërsa Trump deri tani ka qenë i rezervuar ndaj përfshirjes së drejtpërdrejtë amerikane, megjithëse zyrtarët amerikanë thonë se qëndrimi i tij mund të ndryshojë.
Ndërsa këshilltarët e tij ndodheshin në Camp David, Trump u pyet të premten nga gazetarët se cili do të ishte hapi i tij i ardhshëm për Iranin.
“Nëse do t’ju tregoja, do të kishit një lajm të madh. Por do ta shihni. Gjërat po shkojnë shumë mirë. Irani nuk po ia del mirë”, u përgjigj presidenti amerikan.
