Franca pritet të përballet sot me protesta të mëdha studentore, pas thirrjes për një mobilizim mbarëkombëtar kundër problemeve në sistemin arsimor.
Të nisura në shtator, protestat janë përhapur në të gjithë vendin, pasi studentët kërkojnë më shumë investime në arsim, përfshirë uljen e numrit të nxënësve në klasa, përmirësimin e kushteve në shkolla dhe shtimin e stafit.
Sipas autoriteteve franceze, që nga fillimi i tyre janë arrestuar rreth 5,060 persona, 87 % e të cilëve të mitur.
Qindra shkolla janë bllokuar, ndërsa 24 prej tyre janë dëmtuar rëndë nga zjarret dhe plaçkitjet.
Përleshjet mes protestuesve e policisë kanë shkaktuar edhe të lënduar. Një ditë më parë, një 15-vjeçari iu pre dora gjatë një konfrontimi pranë një shkolle në Lens.
Qeveria njoftoi masa për përmirësimin e kushteve në shkolla, por organizatorët e protestave thonë se nuk mjaftojnë.
Unioni “Syndicale Lycéenne” u ka bërë thirrje studentëve dhe qytetarëve të marrin pjesë në protestat e sotme, duke akuzuar qeverinë për mungesë veprimi dhe policinë për përdorim të tepruar të forcës.
Kryeministri Sébastien Lecornu deklaroi se qeveria do të ndërmarrë ndryshime në arsim, por paralajmëroi se nuk do të tolerojë aktet e dhunës.
Edhe sindikata e mësuesve SNES-FSU ka mbështetur mobilizimin. Lideri i së majtës radikale, Jean-Luc Mélenchon, i ka cilësuar protestat si “një nga lëvizjet më të fuqishme studentore në Francë që nga viti 1968”.
