Dita vendimtare për zgjedhjen e presidentin në Kosovë, tensione jashtë Kuvendit për Specialen

Kuvendi i Kosovës hyn në një ditë vendimtare politike, ndërsa deri në mëngjes nuk ishte paralajmëruar asnjë mbledhje e komisioneve parlamentare apo seancë plenare.

Kjo ndodh pikërisht më 6 tetor, kur përfundon afati për zgjedhjen e presidentit të ri të Kosovës. Gjykata Kushtetuese kishte sqaruar se afati 60-ditor për këtë proces nisi më 8 gusht dhe përfundon më 6 tetor.

Në të njëjtën kohë, mbetet i papërfunduar edhe procesi për ndryshimin e Ligjit për Dhomat e Specializuara. Kuvendi i miratoi ndryshimet në lexim të parë më 5 tetor, por projektligji duhet të kalojë edhe procedurat e tjera parlamentare përpara votimit përfundimtar.

Megjithatë, gjatë ditës mund të ketë thirrje për seancë të jashtëzakonshme.

Kryetari i Komisionit për Legjislacion, Vigan Qorrolli, nga Lëvizja Vetëvendosje, ka bërë thirrje që të votohen të dyja çështjet: presidenti i ri dhe ndryshimet në ligjin për Specialen.

“Sot nuk është dita për ta çuar shtetin në prapakthim: e votojmë presidentin dhe e votojmë projektligjin për Specialen, sepse të dyja janë pjesë e të njëjtit detyrim – t’i japim vendit institucione funksionale dhe vendimmarrje”, shkroi Qorrolli në Facebook.

Ai paralajmëroi se dështimi për zgjedhjen e presidentit do ta çonte vendin drejt shpërndarjes së Kuvendit dhe zgjedhjeve të parakohshme.

Debati për presidentin dhe ndryshimet për Specialen është lidhur ngushtë gjatë ditëve të fundit. PDK-ja ka kërkuar që ndryshimet ligjore të miratohen përpara zgjedhjes së presidentit, ndërsa LVV-ja ka insistuar që presidenti të zgjidhet fillimisht.

Ndërkohë, protestat pritet të vazhdojnë edhe gjatë së martës. Organizata e Veteranëve të Luftës së UÇK-së u ka bërë thirrje mbështetësve të mblidhen sërish në sheshin e Prishtinës për të kërkuar përfundimin e votimit të ndryshimeve në Ligjin për Dhomat e Specializuara.

Një ditë më parë, protestat para Kuvendit u shoqëruan me përplasje mes protestuesve dhe policisë. Sipas Policisë së Kosovës, gjashtë efektivë u lënduan, 11 qytetarë kërkuan ndihmë mjekësore dhe tre protestues u shoqëruan në stacion.