Mijëra qytetarë dolën në rrugët e Madridit dhe të dhjetëra qyteteve të tjera spanjolle, duke kërkuar ndërhyrje ndaj krizës së strehimit dhe rritjes së vazhdueshme të qirave. Në protestë u dëgjua thirrja “Greva e përgjithshme tani!”.
Të lidhura
None found
Marshimi në kryeqytet u drejtua për në Plaza Cibeles. Sipas prefekturës, në të morën pjesë rreth 70 mijë persona, ndërsa Sindikata e Qiramarrësve deklaroi se numri i pjesëmarrësve ishte më shumë se gjysmë milioni. Protestuesit brohoritën “Turp!” dhe “Spekulantët jashtë lagjeve tona!”.
Demonstrata u organizuan pas vendimit të Kongresit të Deputetëve për të rrëzuar dy dekrete të qeverisë së kryeministrit Pedro Sánchez në fushën e strehimit. Kundër tyre votuan Partia Popullore, Vox dhe Junts per Catalunya, duke krijuar shumicën që i bllokoi nismat.
Protesta u raportuan në më shumë se 50 qytete, përfshirë Bilbaon, Malagën, Alicante-n, Palma de Mallorcën dhe Ishujt Kanarie.
Situata u tensionua në Valencia, ku disa protestues u përpoqën të kalonin kordonin policor pranë Palau de las Artes. Në atë zonë po zhvillohej një kongres i sektorit të pasurive të paluajtshme. Forcat e rendit përdorën gaz lotsjellës dhe plumba gome; pesë persona u arrestuan dhe nëntë efektivë mbetën të plagosur.
Sindikata e Qiramarrësve kërkon vendosjen e kufizimeve për qiratë, ndalimin e dëbimeve të personave në nevojë, marrjen e masave kundër spekulimeve me pasuritë e paluajtshme dhe frenimin e zgjerimit të qirave turistike.
Qeveria e Sánchez ka bërë të ditur se do të vijojë përpjekjet për të kaluar një paketë të re masash për strehimin, pavarësisht disfatës së fundit në Kongres.
Kjo çështje po ndikon edhe në klimën politike përpara zgjedhjeve të ardhshme. Sánchez nuk e ka përjashtuar mundësinë e shpërndarjes së dy dhomave të Parlamentit dhe zhvillimit të zgjedhjeve të parakohshme, megjithëse mandati aktual përfundon në korrik 2027.
Sipas sondazheve, Partia Popullore do të renditej e para me rreth 33% të votave, përpara PSOE-së me 26% dhe Vox-it me 18%. Projekcionet parashikojnë 137 vende për PP-në, 107 për PSOE-në dhe 62 për Vox-in. Nëse këto shifra do të konfirmoheshin, dy forcat e djathta do të kontrollonin së bashku 199 deputetë, mbi pragun e shumicës absolute prej 176 mandatesh.
Megjithatë, debati për strehimin mund të ndikojë në këtë skenar. Një sondazh i 40dB për “El País” dhe “Cadena SER” tregon se 67.5% e spanjollëve janë pro kufizimit të çmimeve të qirave. Kjo masë mbështetet edhe nga më shumë se 55% e votuesve të Partisë Popullore dhe Vox-it.
Rritja e ofertës së strehimit social gëzon mbështetjen e 82.4% të të anketuarve. Ndërkohë, deri në 75% e tyre favorizojnë shtyrjen e dëbimeve të personave në nevojë dhe kufizimin e rritjes së qirave.
“Masat së pari, pastaj zgjedhjet”, u shpreh ish-ministrja Irene Montero, e cila kërkoi miratimin e një dekreti të ri për uljen e qirave dhe ndalimin e spekulimeve.
Në mbyllje të tubimit në Madrid, zëdhënësja e Sindikatës së Qiramarrësve, Valeria Racu, tha: “Rruga është e qartë dhe është një grevë e përgjithshme”.
