Haxhiu i drejtohet Kushtetueses për kompetencat presidenciale pas skadimit të mandatit

Ushtruesja e detyrës së presidentit të Kosovës Albulena Haxhiu, i ka kërkuar Gjykatës Kushtetuese sqarim se kush mund t’i ushtrojë kompetencat presidenciale pas përfundimit të mandatin gjashtëmujor të saj, në rast se Kuvendi dështon ta zgjedhë presidentin e ri sot.

Gjashtë muajt e Haxhiut si u.d. e presidentes përfunduan më 4 tetor. Më 6 tetor përfundon afati kushtetues për të zgjedhur president të ri. Në rast se sot kjo nuk mbërrihet, Kosova shkon në zgjedhje brenda 45 ditësh. Zgjedhjet shpallen nga presidenti.

“Mund të konfirmojmë që dje më 5 tetor 2026, U.D. Presidentja Haxhiu i është drejtuar Gjykatës Kushtetuese, me kërkesën për sqarimin në raport me ushtrimin e kompetencave presidenciale pas përfundimit të periudhës gjashtëmujore, kur Presidenti i ri ende nuk është zgjedhur”, tha kabineti i Presidentes Haxhiu për Euronews Albania.