Aleanca dorëzon kallëzim penal ndaj Albulena Haxhiut për shpërdorim të detyrës

Nënkryetari i Aleancës për Ardhmërinë e Kosovës (AAK), Burim Ramadani, ka dorëzuar sot kallëzim penal ndaj Albulena Haxhiut, duke e akuzuar për keqpërdorim të pozitës zyrtare gjatë ushtrimit të detyrës si U.D. Presidente e Republikës së Kosovës.

Ramadani pretendon se Haxhiu ka nxjerrë Vendimin nr. 45/2026, përmes të cilit, sipas tij, i është mundësuar një personi të marrë pozitë publike pa iu nënshtruar procedurës së konkursit.

Sipas Ramadanit, bëhet fjalë për propozimin e Vlorës Spanca për një mandat të ri si Auditore e Përgjithshme, pa zhvillimin e një procedure të hapur konkurrimi dhe pa intervistim nga një komision i pavarur.

“Albulena Haxhiu në cilësinë e U.D. Presidentes ka nxjerrë Vendimin nr. 45/2026 për t’i mundësuar një personi pozitë publike pa konkurs, ani pse Ligji e përcakton shprehimisht se duhet të ketë proces të hapur dhe intervistim në komision të pavarur”, ka deklaruar Ramadani.

Ai ka thënë se vendimi është marrë më 2 shtator 2026 dhe më pas është proceduar në Kuvendin e Kosovës për t’iu nënshtruar procedurave parlamentare.

Ramadani pretendon se me këtë veprim janë shkelur dispozitat e Nenit 4, përkatësisht pikat 4.4, 4.5.2 dhe 4.9, të Ligjit nr. 05/L-055 për Auditorin e Përgjithshëm dhe Zyrën Kombëtare të Auditimit.

Sipas tij, Haxhiu, në cilësinë e U.D. Presidentes, ka shfrytëzuar pozitën zyrtare për t’i mundësuar një personi tjetër përfitim të kundërligjshëm dhe nuk është siguruar nëse kandidatja e propozuar i përmbush kriteret e përcaktuara me ligj.

“Ligji është mbi të gjithë! Askush nuk duhet të keqpërdorë pozitën zyrtare”, ka deklaruar Ramadani.