Një hetim që ka tronditur Poloninë ka vendosur në qendër të tij 43-vjeçarin Michael P., i dyshuar për vrasjen e të paktën shtatë grave.
Të lidhura
None found
Autoritetet nuk e përjashtojnë mundësinë që numri i viktimave të jetë më i madh. Për shkak të mënyrës së veprimit dhe provave të mbledhura deri tani, hetuesit e konsiderojnë atë si një prej vrasësve serialë më të rrezikshëm në historinë e vendit.
Michael P. ushtronte profesionin e hidraulikut, çka i krijonte mundësi të hynte në banesat e grave, veçanërisht të atyre që jetonin të pambrojtura. Sipas dosjes hetimore, ai kontrollonte paraprakisht ambientet dhe më pas rikthehej duke përdorur arsye të ndryshme si justifikim.
Dyshohet se, pasi hynte në shtëpi, ai i lidhte gratë dhe i kërcënonte për t’i detyruar të tregonin se ku ruanin paratë apo sendet me vlerë. Policia beson se më pas ai i vriste ato.
Arrestimi i 43-vjeçarit u bë në shkurt të vitit 2025, pas një telefonate që mori një qendër bankare. Një punonjës dëgjoi në sfond zërat e një gruaje që po mbytej. Ajo kishte telefonuar për të kërkuar ndihmë lidhur me ndryshimin e PIN-it të kartës bankare.
Meqë linja mbeti e hapur dhe telefonata po regjistrohej, autoritetet arritën të reagonin. Kur efektivët shkuan në banesën e gruas së moshuar, Michael P. u gjet poshtë ballkonit të shtëpisë.
Hetuesit deklarojnë se në momentin e ndalimit ai ishte nën efektin e drogës. Gjithashtu, 43-vjeçari dyshohet se kishte probleme të lidhura me varësinë ndaj bixhozit.
Gjatë kontrollit të telefonit të tij u zbuluan rreth 75 mijë fotografi. Sipas autoriteteve, disa prej tyre mund të kenë lidhje me gratë që dyshohet se janë viktima të tij.
Një zëdhënës i policisë i tha “Gazeta Wyborcza” se rasti mund ta rendisë Michael P. ndër vrasësit serialë më të rëndë në Poloni dhe, ndoshta, edhe në Evropë.
Në çantën e shpinës së të dyshuarit policia gjeti doreza, shirit elektrik dhe fasha. Hetuesit dyshojnë se këto materiale shërbenin për të kufizuar lëvizjet e viktimave.
Sipas versionit të hetimit, gratë, pasi lidheshin, detyroheshin të tregonin vendet ku kishin fshehur paratë dhe sendet me vlerë. Edhe pasi siguronte informacionin e kërkuar, Michael P. dyshohet se i vriste duke u vendosur qese ose jastëkë mbi fytyrë. Në këto momente, viktimat ishin të lidhura në karrige.
Autoritetet besojnë se në fazat e para ai tregohej më i kujdesshëm për të zhdukur gjurmët. Më vonë, sipas hetuesve, nisi të linte pas më shumë prova, mes tyre edhe fashat e gjetura në duart e viktimave.
Në kuadër të të njëjtit hetim janë vënë në pranga edhe dy shtetas ukrainas, të dyshuar se kanë bashkëpunuar me Michael P. në disa prej vrasjeve.
Njëri prej tyre është 33-vjeçari Taras H., i cili ka pranuar se ka marrë pjesë në ngjarje. Megjithatë, ai ka deklaruar se synimi i tij ishte vetëm vjedhja dhe se nuk kishte pasur qëllim të vriste.
I dyshuari tjetër, Ihor H., u arrestua në nëntor të vitit të kaluar, por mohon çdo përfshirje në ngjarjet për të cilat akuzohet.
