Policia ka dhënë detaje lidhur me zjarrin e regjistruar gjatë orëve të para të mëngjesit në një subjekt për përpunimin e inerteve në Milot të Kurbinit.
Sipas Policisë, ngjarja është regjistruar rreth orës 01:40, ndërsa si pasojë e zjarrit janë djegur katër kamionë dhe një eskavator.
Ndërkohë, roja i objektit, 60-vjeçari me inicialet M. M., është paraqitur në spital me dëmtime fizike në pjesën e fytyrës.
Policia bën me dije se grupi hetimor, nën drejtimin e Prokurorisë, ka nisur veprimet hetimore dhe procedurale për zbardhjen e plotë të rrethanave të ngjarjes, si dhe për identifikimin dhe kapjen e autorëve.
Hetimet vijojnë për të përcaktuar se si është shkaktuar zjarri dhe rrethanat e plota të ngjarjes.
