“Le të shkatërrojnë Los Angeles dhe San Diegon”, deklarata e Trump për luftën me Iranin shkakton zemërim në SHBA
Një deklaratë e presidentit amerikan Donald Trump ka shkaktuar reagime të forta në Shtetet e Bashkuara, pasi gjatë një tubimi elektoral në Nebraska ai përmendi mundësinë që Irani të godasë dy nga qytetet më të mëdha të Kalifornisë, Los Angeles dhe San Diego.
Duke folur në Grand Island, në kuadër të fushatës për zgjedhjet e nëntorit, Trump po komentonte pasojat ekonomike të luftës me Iranin dhe rritjen e çmimeve. Ai i cilësoi këto pasoja si një çmim të vogël për sigurinë e SHBA-së dhe të botës.
Më pas, presidenti amerikan tha se Irani mund të shkatërronte një qytet dhe përmendi konkretisht Los Angeles dhe San Diego, duke deklaruar se ky do të ishte një çmim shumë i vogël. Publiku në tubim e priti deklaratën me duartrokitje.
Trump shtoi se lufta, sipas tij, do të përfundonte shumë shpejt.
Guvernatori i Kalifornisë, Gavin Newsom, reagoi menjëherë ndaj deklaratave të Trump. Ai e akuzoi presidentin se po përdorte një retorikë të rrezikshme në lidhje me sigurinë e banorëve të Kalifornisë.
Zyra e Newsom theksoi se bëhej fjalë për dy nga qytetet më të mëdha të vendit, ku jetojnë miliona amerikanë, duke argumentuar se një deklaratë e tillë nuk duhet të trajtohet si diçka normale.
Edhe kryebashkiakja e Los Angeles, Karen Bass, kritikoi deklaratat e Trump.
Bass tha se detyra e presidentit është të mbrojë vendin dhe qytetarët amerikanë, duke e cilësuar retorikën e përdorur si të papërgjegjshme. Sipas saj, deklarata mund të krijojë shqetësime për sigurinë e Los Angeles, qytetit të dytë më të madh në SHBA.
Reagim pati edhe nga kryebashkiaku i San Diegos, Todd Gloria.
Ai kërkoi që San Diego të mos përfshihet në retorikën e luftës.
San Diego ka rëndësi të veçantë strategjike për SHBA-në, pasi në zonë ndodhen disa prej instalimeve kryesore ushtarake amerikane.
Çfarë nënkuptonte Trump?
Disa komentues kanë ngritur pyetjen nëse Trump po përdorte një formë të ekzagjeruar të humorit politik, duke iu referuar dy qyteteve që tradicionalisht votojnë për demokratët, apo nëse deklarata lidhej me ndonjë vlerësim konkret mbi kërcënimet e mundshme nga Irani.
Nga ana tjetër, komentues konservatorë kanë argumentuar se shprehja “çmim i vogël” i referohej kryesisht rritjes së çmimeve dhe kostove ekonomike të luftës dhe jo shkatërrimit të mundshëm të një qyteti amerikan.
Lidhur me deklaratën nuk pati një sqarim të drejtpërdrejtë nga Shtëpia e Bardhë.
Zyrtarë amerikanë të mbrojtjes kanë deklaruar më herët se Irani nuk ka aktualisht kapacitet për të kryer një sulm të drejtpërdrejtë me raketa kundër territorit kontinental të SHBA-së. Trump, ndërkohë, ka paralajmëruar vazhdimisht se mundësia që Irani të pajiset me armë bërthamore do të përbënte një kërcënim serioz.
