Bekim Sejdiu: I kam njoftuar sërish LDK-në dhe Kurtin, jam tërhequr nga gara për president

Pavarësisht se në konferencën e sotme Albin Kurti përmendi sërish emrin e profesor Bekim Sejdiut duke i kërkuar marrëveshje PDK-së e Bedri Hamzës për Sejdiun president, ky i fundit ka konfirmuar se nuk është më pjesë e garës për këtë post.

Sejdiu ka bërë të ditur se për vendimin e tij ia ka njoftuar sërish kreut të LDK-së, por edhe vetë kryeministrin Albin Kurti, duke ua bërë të qartë se është tërhequr nga procesi për zgjedhjen e presidentit.

“Unë i kam njoftuar, kam qenë në komunikim me krerët e LDK-së edhe i kam njoftuar së fundi edhe krerët e LDK-së edhe kryeministrin Kurti që unë nuk jam pjesë e këtij procesi për zgjedhjen e presidentit të Kosovës, duke qenë se marrëveshja LDK-LVV ka dështuar. Unë kam hyrë në këtë proces, në fillim të shtatorit, dhe kam marrrë këtë barrë të rëndë në një moment kaç të rëndë, me motivin e vetëm të që të ndihmojë Kosovën të dalë nga ky ngërçi vetshkatërrues. Liderët politik mund të përmendin emri tim dhe unë u jam mirënjohës për besimin që e kanë ndaj meje” ka thënë Sejdiu.

Ai ka treguar se në proces kishte hyrë në një kombinim politik ku LDK-ja do të ishte propozuese, ndërsa Lëvizja Vetëvendosje mbështetëse, duke shtuar se komunikimet kryesore i kishte zhvilluar me drejtuesit e LDK-së.

“Unë ju kam thënë që jam i tërhequr, unë nuk jam i informuar. Unë kur kam hyrë me LDK-në si propozuese, VV-në si mbështetëse, me qat konspiracion kam hyrë dhe kryesisht i kam bërë komunikimet me drejtues të LDK-së që më kanë propozu e më kanë thirr mua me hy në këtë proces. E çmoj shumë edhe besimin e kryeministrit Kurti, por unë i kam njoftuar se jam tërhequr nga gara, ju kam treguar se nuk jam pjesë e garës”, ka thënë ai.