Qytetarët kanë nisur të mblidhen para Kuvendit të Kosovës, pasi në orën 12:00 ata kanë paralajmëruar protesta në sheshin "Skënderbeu" për ndryshimet në Ligjin për Dhomat e Specializuara.
Ndërkohë, deputetët e PDK-së janë nisur drejt Kuvendit. Deputeti Fadil Demaku tha për Klan Kosovën se PDK ka një qëllim sot: votimin në lexim të dytë të ndryshimeve për Specialen.
Demaku foli edhe për mundësinë e një takimi mes kreut të PDK-së, Bedri Hamza, dhe kryeministrit Albin Kurti. Forca të shumëta policie ndërkohë janë vendosur në sheshin kryesor të kryeqytetit dhe pranë godinës së Kuvendit.
Nga ana tjetër, ish-deputeti i PDK-së, Sejdi Hoxha, ka deklaruar se zgjedhjet e reja, sipas tij, nuk i konvenojnë ish-krerëve të UÇK-së në Hagë dhe as Kosovës.
“Po mendoj orientim pozitiv i zotëri Kurtit kish mundur me kriju seancën e re që mbahet sot, dhe votimin në lexim të dytë të Ligjit, por sigurisht edhe zgjedhjen e presidentit. Sepse Kosovës nuk i konvenojnë zgjedhjet, UÇK-së, krerëve të saj në Hagë nuk i konvenojnë zgjedhjet, me shku edhe sa muaj të procesit e ata me qëndru pa mbrojtje shtetërore, po e them popullorqe, me qëndru jetim në gjithë këtë proces dhe kauzë kombëtare pa pasur shtetin mbrapa”, u shpreh Hoxha.
