Sulmi me thikë në një shkollë në Turqi, humb jetën një nxënëse

Një nxënëse ka humbur jetën pas sulmit të regjistruar këtë të martë në një shkollë të mesme në Turqi. Viktima mësohet se u plagos rëndë kur një vajzë 15-vjeçare hyri në shkollë të martën në mëngjes dhe e sulmoi atë dhe shtatë persona të tjerë.

Sulmi ndodhi rreth orës 08:40 në një shkollë të mesme në lagjen Basaksehir, në veriperëndim të Stambollit. Sipas Ministrisë së Brendshme Turke, u plagosën gjithsej tetë vajza të moshës 10 deri në 14 vjeç.

Njëra nga nxënëset, e cila ishte shtruar në spital në gjendje kritike, ndërroi jetë nga plagët e marra pavarësisht përpjekjeve të mjekëve. Policia arrestoi një vajzë 15-vjeçare, një nxënëse në vitin e parë të shkollës së mesme në një shkollë tjetër në zonë, si të dyshuar për sulmin.

Guvernatori i Stambollit, Davutoglu, tha se 15-vjeçarja jeton në të njëjtën lagje dhe arriti të hynte në shkollë e veshur me uniformë shkolle. Autoritetet po hetojnë motivet e 15-vjeçares dhe rrethanat në të cilat ajo arriti të hynte në shkollë.