Guvernatori i Nju Jorkut shpall gjendje të jashtëzakonshme pas rritjes së rasteve të fruthit

Guvernatorja e Nju Jorkut , Kathy Hochul shpalli gjendje të jashtëzakonshme të hënën në përgjigje të një rritjeje dramatike të rasteve të fruthit në shtet.

Administrata e Hochul tha se shpallja e gjendjes së emergjencës ishte në përgjigje të një numri në rritje të rasteve të fruthit në zonat rurale të Nju Jorkut dhe shteteve fqinje, përfshirë Pensilvaninë , e cila është përballur me një shpërthim vdekjeprurës që është më i madhi në më shumë se tre dekada.

Në Pensilvani, e cila është fqinje me Nju Jorkun, pesë persona kanë vdekur pasi janë prekur nga sëmundja dhe ka pasur 198 shtrime në spital. Shteti tejkaloi 1,000 raste të fruthit të hënën, ndërsa Ohajo gjithashtu ka parë një rritje.

Nju Jorku, Pensilvania dhe Ohajo kanë popullata të konsiderueshme Amish, të cilat kanë tendencë të jenë të pavaksinuara. Dhe mungesa e vaksinimit ka qenë një faktor nxitës në përhapjen e fruthit pasi përhapja e tij brenda SHBA-së ishte eliminuar në vitin 2000 për shkak të niveleve të larta të vaksinimit.

“Pas shqyrtimit të të dhënave më të fundit mbi rastet e fruthit në shtetin e Nju Jorkut, po shpall një Emergjencë Shtetërore në Rast Fatkeqësie për të forcuar përpjekjet tona të vazhdueshme për t’u përballur me këtë sëmundje”, tha Hochul.