Mbappe përballet me kritika te Real Madrid

Kylian Mbappe po përballet me kritika të reja në Real Madrid, ku një pjesë e drejtuesve kanë shfaqur pakënaqësi për sjelljen dhe disa prej vendimeve të tij individuale.

Sipas OK Diario, në klub është krijuar shqetësimi se sulmuesi francez në disa raste vepron sipas interesave të tij dhe jo në përputhje me qëndrimin e Real Madridit.

Një prej episodeve lidhet me periudhën e rikuperimit nga shqetësimet në gju, kur Mbappe u pa duke ngarë biçikletën, aktivitet që ishte kritikuar më herët nga trajneri Jose Mourinho.

Pakënaqësi ka shkaktuar edhe qëndrimi i francezit për arbitrimin, pasi ai është distancuar nga kritikat e klubit ndaj gjyqtarëve.

Mbappe ka deklaruar se gjyqtarët janë njerëz dhe se nuk ka qenë kurrë një lojtar që ankohet për vendimet e tyre.

Në Valdebebas po shihet gjithashtu me shqetësim përqendrimi i Mbappes te objektivat individuale, veçanërisht te fitimi i Topit të Artë.