Detaje të reja janë zbardhur nga arrestimi i administratorit të “Eco-Alb SHA”, Leli Kaja, i cili dyshohet se u vu në pranga pasi mori një zarf me para, në kuadër të një hetimi të SPAK-ut për korrupsion.
Sipas të dhënave të bëra publike, bëhet fjalë për 4 milionë lekë të vjetra, ose 400 mijë lekë të reja, numrat serialë të kartëmonedhave të të cilave ishin regjistruar më herët nga hetuesit. Paratë dyshohet se janë kërkuar dhe pranuar nga administratori i “Eco-Alb SHA” në këmbim të mosveprimit të tij lidhur me një procedurë ligjore.
Hetimi ka nisur pas një referimi të bërë nga Byroja Kombëtare e Hetimit dhe, sipas burimeve, është zhvilluar gjatë katër ditëve. Krahas rastit konkret, po verifikohen edhe marrëdhënie të tjera të dyshimta që administratori mund të ketë pasur me operatorë ekonomikë.
Gjatë operacionit, hetuesit kanë sekuestruar disa aparate celularë, si dhe dokumentacion dhe praktika që mund të shërbejnë si prova për hetimin.
Leli Kaja mban detyrën e administratorit të “Eco-Alb SHA” prej tetorit të vitit 2022. Ai pritet të dalë të enjten përpara Gjykatës së Posaçme për caktimin e masës së sigurisë.
Seanca pritet të zhvillohet në një situatë të veçantë për shkak të njoftimit të avokatëve për bojkotimin e seancave për masat e sigurisë në GJKKO. Avokatët kanë bërë të ditur se do të tërheqin edhe nga listat avokatët e caktuar kryesisht, të njohur ndryshe si avokatët e siguruar nga shteti.
Ndërkohë, hetimet për rastin vijojnë dhe pritet që gjatë fazave të mëtejshme të përcaktohet roli dhe përgjegjësia e administratorit në lidhje me akuzat e ngritura nga organi i akuzës.