Një incident ka përfshirë dy avionë në Aeroportin Ndërkombëtar të Los Anxhelosit, por për fat nuk raportohet asnjë i plagosur.
Të lidhura
None found
Ngjarja ka ndodhur të martën rreth orës 10:30 sipas kohës lokale, dhe Administrata Federale e Aviacionit (FAA) në SHBA ka filluar hetimet.
Sipas FAA, një Airbus A350 i kompanisë Delta Air Lines, që po lëvizte në rrugën lidhëse për t’u ngritur, ka prekur me majën e krahut të majtë stabilizatorin horizontal të një Boeing 777 të Air Canada.
Avioni i Air Canada kishte mbërritur nga Toronto dhe në çastin e ngjarjes po tërhiqej nga një mjet drejt portës; ai kishte ndaluar pak përpara se të arrinte te porta, sipas autoriteteve.
Të dy transportuesit konfirmuan se avionët u prekën fizikisht dhe njoftuan se nuk pati persona të lënduar.
Në avionin e Delta ndodheshin 275 udhëtarë dhe 15 anëtarë të ekuipazhit.
Delta Air Lines theksoi se siguria e klientëve dhe punonjësve të saj është prioriteti absolut dhe kërkoi falje për shqetësimin dhe vonesën e shkaktuar në udhëtimet e pasagjerëve.
Ndërkohë, Air Canada njoftoi se avioni do të tërhiqet nga shërbimi për t’iu nënshtruar inspektimeve dhe riparimeve të domosdoshme.
Edhe Delta ka nisur vlerësimin teknik të avionit, ndërsa ekipet e mirëmbajtjes dhe stafi i aeroportit do të përcaktojnë nivelin e dëmeve.
