Shkollat që u mbyllën në Francë për shkak të protestave do të nisin të rihapen gradualisht nga sot. Qindra mijëra nxënës, prindër dhe sindikalistë dolën në rrugë për të kërkuar klasa me më pak nxënës, plotësimin e vendeve vakante të mësuesve dhe përmirësimin e kushteve në shkolla. Sipas qeverisë, 891 shkolla të mesme u përballën me probleme ose pezulluan mësimin. Autoritetet raportuan mbi 250 mijë protestues, ndërsa organizatat studentore e çojnë pjesëmarrjen në rreth 450 mijë.
Ministria e Arsimit ka kërkuar që rikthimi në mësim të bëhet me faza, duke u dhënë përparësi nxënësve të klasave të fundit. Shkollat do të organizojnë gjithashtu takime me nxënësit për të diskutuar kërkesat e tyre. Në Paris, mijëra protestues marshuan nga Place de la République drejt Place de la Nation. Policia përdori gaz lotsjellës gjatë disa incidenteve, ndërsa 32 persona u arrestuan dhe 14 u plagosën. Përplasje u raportuan edhe në Marsejë dhe Rennes.
Protestat kanë ngritur gjithashtu pikëpyetje për përdorimin e forcës nga policia. Autoritetet po hetojnë disa incidente ku janë plagosur rëndë të mitur gjatë demonstratave. Kryeministri Sébastien Lecornu deklaroi se qeveria “tani duhet të dëgjojë”. Organizatat studentore, ndërkohë, paralajmërojnë se mobilizimi do të vazhdojë nëse kërkesat nuk marrin përgjigje konkrete, ndërsa protesta të reja janë njoftuar për të enjten.
