‘Kushti i SHBA-së për t’i dhënë fund luftës’/ Vance: Irani të ulë ndjeshëm pasurimin bërthamor

Zëvendëspresidenti amerikan JD Vance i ka bërë të qartë Iranit se një marrëveshje për t’i dhënë fund luftës shtatë mujore do të kërkojë një reduktim të ndjeshëm të kapacitetit të pasurimit bërthamor. Në një intervistë ekskluzive për Reuters, Vance tha se Teherani duhet të ndërmarrë hapa konkretë për të dëshmuar se nuk synon ndërtimin e armëve bërthamore, duke vënë në pikëpyetje nevojën për pasurimin e uraniumit në nivelin 60 për qind.

Vance, i cili më parë ka qenë skeptik për përfshirjen e SHBA-së në konfliktet e huaja, është tashmë një prej figurave kryesore të përpjekjeve për arritjen e një marrëveshjeje me Iranin. Gjatë javëve të fundit, Uashingtoni dhe Teherani kanë shkëmbyer propozime për përfundimin e konfliktit dhe rihapjen e Ngushticës së Hormuzit, një prej rrugëve më të rëndësishme në botë për transportin e energjisë. Një marrëveshje e ndërmjetësuar në qershor për një armëpushim të përkohshëm dështoi shumë shpejt.

Konflikti ka tronditur tregjet globale të energjisë dhe po kthehet gjithnjë e më shumë në një barrë politike për administratën Trump dhe republikanët përpara zgjedhjeve të mesmandatit në nëntor. Reuters raporton se Presidenti Donald Trump ka refuzuar ofertën e fundit të Teheranit dhe ka paralajmëruar se operacionet ushtarake mund të intensifikohen pas zgjedhjeve. Në të njëjtën kohë, Vance pranoi se Uashingtoni ende nuk e ka të qartë se si merret vendimi në Teheran gjatë negociatave.