Të paktën 17 persona, mes tyre 12 ushtarë dhe pesë minatorë, janë vrarë në një sulm të kryer nga një grup banditësh në shtetin Zamfara, në veriperëndim të Nigerisë. Ngjarja ndodhi pranë fshatit Bidin, në rajonin Marou ku dhjetëra persona të armatosur që lëviznin me motoçikleta sulmuan fillimisht një minierë të paligjshme ari. Sipas dy burimeve lokale të cituara nga AFP, pesë minatorë u vranë në minierë, ndërsa më pas grupi u drejtua drejt fshatit, ku u përplas me forcat e sigurisë.
Në shkëmbimin e zjarrit mbetën të vrarë 12 ushtarë. Abdullahi Musa Mutunji, këshilltar i fshatit, konfirmoi bilancin e viktimave. “Banditë vranë 17 persona në këtë sulm, 12 ushtarë dhe pesë minatorë”, tha ai. Sipas dëshmive të banorëve, sulmi ishte një akt hakmarrjeje. Një prej banditëve kishte kërcënuar minatorët me armë dhe u kishte kërkuar një pjesë të arit që kishin nxjerrë. Minatorët dyshohet se e çarmatosën dhe e vranë atë. Viktima ishte pjesë e grupit të Guaska Dankaramit, një prej bandave që besohet se ushtron kontroll në zonë. Pas marrjes së lajmit për vdekjen e tij, Dankarami dyshohet se mobilizoi njerëzit e tij dhe organizoi sulmin.
“Kur Dankarami e mori vesh, ai mobilizoi njerëzit e tij dhe nisi një sulm”, tha Lawan Wanjam, një banor që humbi djalin në këtë ngjarje. “Ata vranë 12 ushtarë dhe pesë minatorë, përfshirë djalin tim”, deklaroi ai për AFP. Banorët thonë se komuniteti kishte arritur më herët një marrëveshje armëpushimi me grupin e Dankaramit, por sipas tyre, anëtarët e bandës vazhduan të ushtronin presion mbi fshatarët dhe minatorët për t’u dhënë një pjesë të arit të nxjerrë. Ushtria nigeriane nuk iu përgjigj menjëherë kërkesës së AFP-së për koment mbi ngjarjen. Zamfara është një nga shtetet në veriperëndim të Nigerisë ku grupet e armatosura, të njohura gjerësisht si “banditë”, kanë intensifikuar aktivitetin prej vitesh. Grupet kryejnë sulme ndaj fshatrave, rrëmbime për shpërblim, vjedhje bagëtish, plaçkitje dhe djegie banesash.
Minierat e paligjshme të arit konsiderohen një prej faktorëve që ushqejnë aktivitetin e këtyre grupeve në veriperëndim dhe në pjesë të Nigerisë qendrore. Bandat konkurrojnë për kontrollin e zonave minerare dhe kërkojnë një pjesë të arit të nxjerrë nga minatorët, duke shkaktuar shpesh përplasje të dhunshme. Guaska Dankarami është lidhur gjithashtu me një prej rasteve më të mëdha të rrëmbimeve masive në Nigeri. Ai besohet të ketë qenë një nga organizatorët e rrëmbimit të më shumë se 300 nxënësve nga një shkollë me konvikt për djem në shtetin fqinj Katsina, në dhjetor të vitit 2020. Nxënësit u liruan rreth një javë më vonë, pasi autoritetet paguan një shpërblim.
