"Në burg ke për të shkuar"/ Rama pritet me protesta nga qytetarët në zonën e ish-Uzinës

Kryeministri Edi Rama është pritur me reagime të ashpra nga qytetarët ditën e sotme gjatë një vizite që po zhvillonte në zonën e ish-Uzinës në Tiranë, ku ndodhet një ambient i kompanisë “KAYO”.

Sekretari për Reagimin Qytetar në PD, Erges Eskiu, ka ndarë në rrjetet sociale edhe videon kur banorët i bëjnë thirrje Ramës të japë dorëheqjen. Eskiu shprehet se banorët e kësaj zone kanë 13 vjet pa ujë të pijshëm, ndërsa shton se kreu i qeverisë vetëm i mashtron në çdo takim të tyrin.

“Një kërkesë kanë këta, jep dorëheqjen dhe ik në burg. Me KAYO-n, me Ron Yeffet-in, atë tjetrën që more nga Kosova. Burgu po të pret, nuk shpëton jo, në burg ke për të shkuar. Ja uji i pijshëm derdhet. Ja çfarë pinë banorët. Ka 13 vjet rrugë nuk ka, bën sikur i qan hallet ky. Në burg ka për të shkuar”, shprehet Eskiu në videon e postuar.  

Qytetarët nga ana tjetër janë shprehur se Rama nuk i ka dëgjuar problemet e tyre dhe nuk ka dhënë një zgjidhje për situatën, për të cilën sipas tyre është në dijeni prej kohësh. /CNA