Murtaja në Rusi, Peskov sulmon mediat e huaja: E informuam OBSH-në siç duhet

Rusia njoftoi me kohë Organizatën Botërore të Shëndetësisë për vdekjen e një punonjëseje në një institut kërkimor për murtajën në Siberi javën e kaluar, tha sot zëdhënësi i Kremlinit, Dmitry Peskov, duke akuzuar median për përhapjen e informacionit të rremë në lidhje me rastin.

Peskov po i referohej një raporti të ABC Neës që tha se Shtetet e Bashkuara kishin paraqitur një protestë zyrtare diplomatike ndaj mënyrës se si Rusia trajtoi vdekjen, duke i kërkuar Moskës të jetë më transparente në lidhje me incidentin.

Punonjësja e laboratorit u sëmur dhe vdiq në rrethana të panjohura, duke bërë që autoritetet të karantinonin dhjetëra njerëz dhe të dërgonin kreun e autoritetit rus të mbikëqyrjes shëndetësore në rajonin e Irkutskut.

Peskov tha se pjesa më e madhe e mbulimit mediatik rreth incidentit ishte e rreme dhe se njerëzit duhet të mbështeten në informacionin e lëshuar nga organi shtetëror i shëndetësisë, Rospotrebnadzor.

Të martën, autoriteti tha se nuk ishte zbuluar asnjë rast i murtajës tek askush që kishte rënë në kontakt me viktimën, ndërsa banorët e zonës thanë se jeta e tyre mezi ishte ndërprerë.

Peskov sqaroi se për momentin nuk është planifikuar asnjë bisedë telefonike midis Presidentit rus Vladimir Putin dhe homologut të tij amerikan, Donald Trump, i cili tha dje, të martën, se do të fliste me Putinin “shumë shpejt” për rastin.