Berisha thirrje shqiptarëve: Të protesojmë para parlamentit që nuk meriton të ekzistojë

Kreu i PD-së, Sali Berisha, në një deklaratë në mbledhjen e grupit parlamentar ka deklaruar se kryeministri Edi Rama ka reduktuar 15 bashki për hir të karriges së tij dhe pushtetit.

Berisha u ka bërë thirrje shqiptarëve që të mblidhen për të protestuar ditën e nesërme para parlamentit që sipas tij nuk e meriton të ekzistojë.

“Edi Rama për hir të karriges së tij po redukton 15 bashki.

Ky është një akt shumë i rëndë, një akt faktikisht shpallje armiqësie të hapur ndaj banorëve të këtyre bashkive që kanë reaguar me qytetari kundër këtij projekti.

Përveç kësaj PD në projektin e saj ka parashikuar 100 bashki dhe e ka lënë të hapur këtë projekt për shtimin e bashkive të tjera. Nesër qytetarë nga mbarë Shqipëria pavarësisht bindjeve politike do bashkohen në një protestë për të mbrojtur interesat qytetare. Kundërshtimin për asgjësimin e bashkive e kanë dëshmuar në shumicën e rasteve qytetarët e të gjitha bindjeve politike.

Është e rëndësishme kjo seancë në të cilën ne duam t'u faktojmë qytetarëve shqiptarë se ky person i shndërruar në padrinon e vendit ka interesin e pushtetit të tij, si të garantojë karrigen dhe mbijetesën mbi krimin monstruoz. Edi Rama po kërkon të mbahet me çdo kusht në pushtet. Ftoj qytetarët të protestojnë para parlamentit që nuk meriton të ekzistojë. Ai parlament është bërë zëdhënës i interesave më kriminale të Ramës dhe organizatës së tij kriminale”, tha Berisha./ CNA