San Marino theu “mallkimin”, mësoni kombëtaret që ende nuk i kanë shënuar Shqipërisë

Goli i San Marinos në humbjen 2-1 ndaj Shqipërisë i dha fund një serie prej 5 ndeshjesh pa shënuar ndaj kuqezinjve.

Ky ishte goli i parë i përfaqësueses së San Marinos në historinë e përballjeve me Shqipërinë. Pavarësisht këtij goli, bilanci në 6 duele direkte mbetet 18:1 në favor të Shqipërisë.

Pas San Marinos, Lihtenshtejni është tashmë e vetmja kombëtare që është përballur më shumë se një herë me Shqipërinë dhe nuk ka shënuar asnjë gol.

Në 4 ndeshjet mes Shqipërisë dhe Lihtenshtejnit, kuqezinjtë kanë marrë 4 fitore dhe kanë golaverazhin 9:0. Gjibraltari, Irani dhe Uzbekistani kanë humbur 1-0 në përballjet e tyre të vetme me Shqipërinë, pa mundur të shënojnë.

Vietnami ka humbur 5-0, ndërsa Kameruni, Kuba dhe Maroku kanë regjistruar barazime 0-0 në të vetmet përballje me kuqezinjtë.

Me golin e San Marinos, Lihtenshtejni mbetet tashmë kundërshtari i vetëm që nuk ka shënuar asnjëherë ndaj Shqipërisë në më shumë se një përballje.