Një tjetër natë ‘ferri’ mbi Ukrainë… Rusia ka lëshuar një prej sulmeve më të rënda, duke shkaktuar mbi 19 persona të vrarë dhe 60 të plagosur. “Sot, për ditëlindjen e Putinit, ushtria ruse i ka dhuruar shkatërrimin e një pallati rezidencial në Priljuk, në rajonin e Çernihivit. Ishte një pallat me 5 kate”, deklaron presidenti i Ukrainës, Volodymyr Zelensky.
Ai shton se një prej synimeve të Moskës është dëmtimi apo shkatërrimi i rrjetit energjitik. Zelensky rithekson nevojë jetike që vendi i tij ka për mbrojtjen ajrore: “Pikërisht për këtë arsye kërkojmë çdo ditë raketa për sistemet Patriot, që mund të mbrojnë jetën e personave këtu në qiellin e Ukrainës”, thekson ai.
Rusia pretendon se ka shënjestruar disa fabrika ushtarake që prodhonin, mes tjerash, raketa Flamingo. Në Priljuk bilanci i viktimave shkoi në 13, ndërsa rezultojnë ende persona të zhdukur që mund të jenë nën rrënoja, shkruan A2 CNN. Raketa dhe dronë ranë gjithashtu mbi kryeqytetin Kiev. Të paktën 2 persona kanë humbur jetën, ndërsa miliona kërkuan strehim në zona të sigurta.
Kryebashkiaku, Vitali Kliçko, njoftoi se janë goditur komplekse banimi, ndërsa ekipet e emergjencës shkuan menjëherë në vendngjarje për të shuar flakët dhe shpëtuar njerëz të bllokuar. Alarmi ajror u dëgjua thuajse në të gjithë territorin e Ukrainës, në një kohë kur për vizitë gjendet Komiteti Ushtarak i NATO-s, me në krye admiralin Xhuzepe Kavo Dragone.
Luftë ka pasur edhe në anën tjetër të kufirit. Rusia pretendon rrëzimin e 311 dronëve të lëshuar nga Ukraina në mbi 16 rajone të ndryshme, përfshirë Detin e Zi dhe atë Azov. Zelenski e quajti atë një “përgjigje të drejtë ndaj të gjitha sulmeve ruse”, teksa njoftoi se janë goditur dy objekte nafte dhe një kamp stërvitor. (A2 Televizion)
A2 CNN Livestream
MUND TE LEXONI GJITHASHTU
