Historia e dashurisë mes Baby dhe Johnny do të ngjitet për herë të parë në skenën e Broadway-t, me “Dirty Dancing: The Musical”, një produksion i ri që do të nisë shfaqjet në New York në vitin 2027.
Muzikali do të zhvillojë shfaqjet e para më 12 shkurt 2027 në Lena Horne Theatre, ndërsa premiera zyrtare do të mbahet më 14 mars. Angazhimi i kufizuar do të vijojë deri më 5 shtator 2027. Shfaqja vjen në kuadër të 40-vjetorit të filmit origjinal, i cili u publikua në vitin 1987.
Në rolet kryesore do të jenë Annalese Starzec si Frances “Baby” Houseman dhe Blake Zelesnikar si Johnny Castle. Të dy kanë interpretuar të njëjtat role edhe në turneun e produksionit në Amerikën e Veriut dhe tani do të bëjnë debutimin e tyre në Broadway.
Historia mbetet e vendosur në verën e vitit 1963, në Catskills, ku Baby, gjatë pushimeve me familjen, afrohet me instruktorin e vallëzimit Johnny. Marrëdhënia e tyre zhvillohet përmes vallëzimit, ndërsa të dy përballen me dallimet sociale dhe pritshmëritë e familjeve të tyre.
Muzikali është shkruar nga Eleanor Bergstein, skenaristja e filmit origjinal. Në të do të përfshihen edhe këngët e njohura të filmit, mes tyre “(I’ve Had) The Time of My Life”, “Hungry Eyes”, “Do You Love Me?” dhe “She’s Like the Wind”.
Regjisori i produksionit është Lonny Price, i cili ka një lidhje të veçantë me filmin e vitit 1987: ai interpretoi personazhin Neil Kellerman në versionin origjinal. Koreografia është realizuar nga Darrell Grand Moultrie.
Produksioni përfshin një kast prej 27 aktorësh, ndërsa 21 prej tyre do të bëjnë debutimin në Broadway. Pas përfundimit të angazhimit në New York, turneu i “Dirty Dancing: The Musical” do të vijojë në Amerikën e Veriut.
Filmi origjinal, me Jennifer Grey dhe Patrick Swayze në rolet e Baby dhe Johnny, u kthye në një fenomen kulturor dhe muzikor. Tashmë, katër dekada pas premierës, historia po rikthehet në një tjetër format skenik, ndërsa Lionsgate po zhvillon paralelisht edhe një vazhdim filmik ku Jennifer Grey do të rikthehet në rolin e Baby.
