Kupa e Shqipërisë rikthehet sot me një ditë të ngjeshur futbolli.
Në program janë plot 13 ndeshje të turit të par&...
AKTUALITET
Tragjedi në Itali, shqiptari 59-vjeçar humb jetën pasi bie nga skela në kantier ndërtimi
PiranjatPërditësimi i fundit 7 Tetor 2026, 17:06
Një ngjarje e rëndë ka ndodhur ditën e djeshme në një kantier ndërtimi në Via Coletti, në Rivabella të Italisë, ku një shtetas shqiptar humbi jetën pasi ra nga skela gjatë punës.
Viktima është identifikuar si Saim Myrtaj, 59 vjeç, me origjinë shqiptare. Sipas mediave italiane, aksidenti tragjik ka ndodhur rreth orës 13:30 të së hënës. Myrtaj ndodhej mbi skelat e vendosura përgjatë fasadës së jashtme të një ndërtese dykatëshe, ku po kryheshin punime mirëmbajtjeje, kryesisht në tarraca dhe në kornizat e godinës.
Sipas të dhënave paraprake, ndërsa ndodhej në katin e dytë të skelës, 59-vjeçari dyshohet se ka rrëshqitur dhe ka rënë në hapësirën e përdorur për kalimin e shkallëve mes kateve. Hetimet për zbardhjen e plotë të rrethanave të aksidentit janë ende në vijim.
Alarmi është dhënë nga qiramarrësi i godinës, i cili, pasi ka dëgjuar një zhurmë të fortë nga jashtë, ka dalë menjëherë për të parë se çfarë kishte ndodhur. Pasi ka konstatuar situatën tragjike, ai ka njoftuar menjëherë autoritetet, të cilat kanë mbërritur në vendngjarje dhe kanë nisur hetimet për të përcaktuar dinamikën e saktë të aksidentit.
Ndërkohë, Prokuroria e Riminit ka hapur një hetim për vrasje të paqëllimshme ndaj personave të panjohur, me qëllim zbardhjen e plotë të rrethanave që çuan në vdekjen e shqiptarit. Prisht që hetimet të vijojnë, ndërsa autopsia pritet të ndihmojë në përcaktimin e shkaqeve të sakta të vdekjes.
Lajmi ka shkaktuar dhimbje të madhe te familjarët e Saim Myrtajt. 59-vjeçari, i cili ishte një nga shtyllat kryesore të familjes, la pas bashkëshorten dhe dy fëmijë, një djalë dhe një vajzë.
