Tirana pritet të përfshihet sërish këtë të martë nga protesta kundër qeverisë, në një aksion që tashmë ka hyrë në muajin e pestë dhe shënon tubimin e 130-të.
Protestuesit do të mblidhen në mbrëmje në sheshin “Skënderbej”, ndërsa më pas do të zhvendosen drejt Kryeministrisë. Në fokus të thirrjeve të tyre vijon të jetë largimi i Edi Ramës nga posti i kryeministrit dhe ndryshimi i qeverisjes.
Por kërkesat e protestuesve shkojnë përtej dorëheqjes së kryeministrit. Në ditët e protestave janë kërkuar një qeveri teknike tranzitore, ndryshime në rregullat e sistemit politik dhe zgjedhor, si dhe kundërshtimi apo rishikimi i disa nismave ligjore të qeverisë.
Në protestat e fundit është shfaqur edhe një tjetër grupim: studentët. Rikthimi i tyre në auditore është shoqëruar me pjesëmarrjen e disa të rinjve në tubim, të cilët lanë përpara Kryeministrisë edhe mesazhin “Studentët protestues”.
Ndërkohë, organizatorët kanë paralajmëruar një pjesëmarrje më të madhe të studentëve dhe të rinjve më 13 tetor, duke e cilësuar atë si një tjetër pikë të rëndësishme të aksionit.
Protesta, sipas organizatorëve, do të vijojë çdo ditë, ndërsa tubimet do të ndalen vetëm nëse kërkesat e artikuluara prej tyre marrin përgjigje.
