Ish-ortaku i biznesmenit kosovar Behgjet Pacolli, Valon Lluka, është ndaluar nga Policia e Kosovës, në një zhvillim që vjen në të njëjtën ditë me një vendim të Gjykatës së Apelit në Tiranë për çështjen e Aeroportit të Vlorës.
Sipas raportimeve të mediave kosovare, Lluka është ndaluar për 48 orë nga Njësia për Hetimin e Krimeve Ekonomike dhe Korrupsionit. Deri tani nuk janë bërë publike detaje të plota mbi rastin për të cilin është ndaluar.
Ndërkohë, në Tiranë, Behgjet Pacolli ka njoftuar se Gjykata e Apelit i ka dhënë të drejtë kompanisë së tij “Mabco”, duke rrëzuar vendimin që, sipas tij, kishte penguar hyrjen në terminalin e Aeroportit të Vlorës për përfundimin e punimeve dhe certifikimin e objektit.
“Sot edhe GJYKATA E APELIT e Tiranës e hodhi poshtë vendimin e nxitur, të jashtëligjshëm dhe të shëmtuar, të MIRIANA NAKES, që shkaktoi bllokimin e hyrjes në Terminal për të përfunduar punimet dhe për të certifikuar veprën”, shkroi Pacolli.
Ky zhvillim vjen pas një vendimi të mëparshëm të Gjykatës së Lartë, e cila kishte vendosur në favor të Pacollit lidhur me Aeroportin e Vlorës. Megjithatë, përplasja mes Pacollit dhe ish-ortakut të tij Valon Lluka ka vijuar dhe çështja tashmë është dërguar në Arbitrazh.
Pacolli ka deklaruar se pas ndërhyrjes së një arbitri emergjent ndërkombëtar janë vendosur masa për ruajtjen e status quo-së, duke kufizuar veprime të caktuara dhe duke e lënë projektin në një situatë pasigurie.
“Prandaj, pyetja mbetet thelbësore: A do të lejohemi të përfundojmë punimet dhe vendosim në operim këtë vepër të rëndësishme për popullin shqiptar në mbrojtje të interesit publik?”, është shprehur ai.
Në të njëjtën kohë, mediat në Kosovë raportuan për ndalimin e Valon Llukës, i cili ka qenë ish-drejtor i kompanisë “Mabetex” dhe ish-ortak i Pacollit në projektin e Aeroportit të Vlorës.
Sipas raportimeve të “Gazeta Express” dhe “Blic”, Lluka është ndaluar për 48 orë, ndërsa autoritetet nuk kanë bërë ende të ditura hollësitë mbi hetimin.
Përplasja mes dy biznesmenëve ka qenë publike prej kohësh. Pacolli e ka akuzuar ish-ortakun e tij, të cilin më parë e kishte konsideruar një nga njerëzit e tij më të besuar, për përvetësim të shumave të konsiderueshme parash, akuza që Lluka i ka kundërshtuar.