Shqiptarët po i ushqejnë me lugën e "çorbës" së videove banale

Një video e dhjetë viteve më parë, në një ambient privat, midis dy personave privatë, njëri prej të cilëve gazetar, ka filluar të qarkullojë sot në telefonat e gazetarëve në Tiranë, kolegëve të tij, por edhe shumë qytetarëve të thjeshtë.

Video e parë 10 viteve, përse duhet të shpërndahej sot, lind pyetja?

Në fakt, më thelbësorja është se çfarë interesi ka publiku mbi atë se çfarë bën një gazetar në një ambient privat? Një njeri që s'ka punuar kurrë në shtet, si hyn kujt në punë, si merr kujt asnjë taksë.

Ndërkohë, në të njëjtën ditë, pra po sot, Thesari ka disbursuar dhjetëra milionë euro për inceneratorët që nuk ekzistojnë, për PPP-të, janë zhvilluar dhjetëra tendera, janë paguar para korrupsioni, shëndetësia vazhdon të jetë skandaloze, shumë njerëz në shtëpi nuk kanë bukë të hanë, por me sa duken ushqehen dhe ngopen me perversitetin e videove erotike apo takimeve intime, edhe te ato videot e para të Adi Hilës, pavarësisht se mund të kishte një diskutim publik, në lidhje me moralin e personave të përfshirë.

Në fakt të gjithë ishin privatë, të gjithë në jetën e tyre kudo në botë, patjetër jeta e njerëzve të botës së showbiz-it përbën skandal, lexohet, klikohet, por kurrsesi nuk është “ushqim”.
Kurrsesi si nuk ngelet çështja kryesore e ditës.

Në Shqipëri, kjo javë ka qenë e mbushur plot e përplot thjesht dhe vetëm me një interes: videot erotike të disa këngëtarëve, një kompozitor që i kishte filmuar, tani nxjerrin dhe një video të një gazetari.

A thua morali në Shqipëri është në kulm? Ata që i nxjerrin videot, moralistët? A thua se nuk janë mëkatarë, janë po kaq të ndershëm?

Del dhe ndonjë i “çmendur” tjetër që pretendon se është gazetar, mbledh me mijëra njerëz online në rrjetet sociale, e fillon shpif, gënjen, mashtron, vë gjoba. Thashetheme, injorancë, njerëz të rritur të pangopur nga jeta, të mangët në çdo aspekt.

Thjesht dhe vetem duan thashetheme, kush shkoi me kë. Ndërkohë, as u shtohet gjë në qese, thjesht dhe vetëm vazhdojnë të jenë po aq të varfër nga xhepat, po aq të papunë, po aq të vjedhur, po aq të mjerë dhe të përmjerë njëkohësisht.

E në vend që ditën kur plasi skandali Agasi-Hyseni dhe u tregua se shteti kishte rënë në gjunjë, ishte marrë peng nga një individ me “bekimin” e Kryeministrit, shqiptarët kënaqeshin, dikush ndoshta edhe masturbohej me videot që kishin rrjedhur nga studio e një kompozitori të marrë dhe manjak, videot të cilat përfunduan në duart e shqiptarëve, të cilët në vend që të mblidheshin përpara Kryeministrisë dhe të mos largoheshin aty derisa të ikte kjo qeveri dhe të çonim vendin në zgjedhje të parakohshme, sepse iu kanë vjedhur identitetin me AKSHI-in, iu kanë vjedhur sigurinë kombëtare me shishin, iu kanë vjedhur paratë dhe taksat e tyre, me keqmenaxhimin që bëhet ditë pas dite, kënaqeshin, shijonin videot e disa këngëtareve në meso-moshë.

Dhe tani vazhdojnë me perversitete dhe intriga të bëra nga lufta e mediave me një gazetar.
Askush nuk merret me interesin publik. Askush nuk merret me atë që ndodh me korrupsionin që shtohet çdo ditë. Askush nuk merret me vjedhjen që u bëhet shqiptarëve çdo ditë. Askush nuk merret me shëndetësinë skandaloze që kemi përditë. Askush nuk merret me shkollat, me arsimin, me kulturën, me punësimin, me pensionistët e mjerë, që nuk ju del muaji të blejnë ilaçet me ato të ardhura që kanë nga ky shtet, që nga kjo qeveri dhe ky shtet që i vjedh pa ndalur, por shijojnë videot.

Doli një lajm, ky gazetari është i famshëm, ky ka tradhtuar, megjithëse përditë në Gjykatën e Tiranës ka divorce pa fund, me mijëra të tilla.

Ata që bëjnë më shumë moral në fakt janë më imoralët, ata që nxjerrin këto videot dhe pretendojnë për tradhti, ata janë më të tradhtuarit, por thjesht dhe vetëm janë më të ndyrët se "fërkojnë barkun" pasi dikush ka një foto, video, ia publikojnë dhe krijojnë kënaqësinë e jetës së tyre.

Kalojnë në atë orgjinë e tyre që s'e kanë në video, por e kanë në mendje, duke parë të tjerët dhe janë më të sëmurë sesa ata që i nxjerrin vetë, apo dhe këta të dytët që ndoshta duhen mbyllur në çmendinë, që nëpërmjet intrigash, mashtrimesh, skenarësh, prodhojnë në rrjetet sociale fake news-e, manipulojnë histori me video dhe lajme për personalitete publike, për njerëz të botës së artit, biznesmenë, qoftë edhe politikanë, po të duan.

Por askush prej tyre nuk ka pikën e moralit dhe siç tha Krishti: "Të hedh gurin i pari ai që s'ka mëkatuar."

Këta edhe janë mëkatarë dhe nuk hedhin një gurë, por hedhin tufa me gurë. Të tillë janë; të mjerë në shpirt, të mjerë në mendje, të varfër mendërisht.

Thjesht dhe vetëm vuajnë nga një delir dhe nga pangopësia e të qenit faktor publik, se po denoncojnë skandalet e mëdha.

E në rast se ka afëra të vërteta seksuale, ato duhen kallëzuar, hetuar dhe zbardhur. Nuk kalohen me perversitete dhe orgji mendore apo masturbimin e disa infantilëve dhe të çmendurve që vendin e kanë në çmendinë./CNA