Një prej ligjvënësve më të lartë të Partisë Demokratike në SHBA ka kërkuar informacion të detajuar mbi ...
BOTA
I mbijetoi ekzekutimit, Christa Pike rast i pashembullt në mjekësi! A do të ketë një përpjekje të tretë për ta eliminuar?
PiranjatPërditësimi i fundit 7 Tetor 2026, 19:03
Rimëkëmbja e Christa Pike pas administrimit të injeksionit vdekjeprurës është cilësuar nga avokatët e saj si “i pashembullt nga pikëpamja mjekësore”, pasi konsiderohet rasti i vetëm i njohur në SHBA i një personi që ka mbijetuar pas një procedure ekzekutimi.
Sipas ekipit të saj ligjor, 50-vjeçarja tashmë ka rifituar vetëdijen dhe është në gjendje të flasë, megjithatë vazhdon të qëndrojë e shtruar nën monitorim të rreptë mjekësor.
Sipas Washington Post, mbetet e paqartë si do të evoluojë gjendja e saj shëndetësore dhe çfarë do të ndodhë më tej me dënimin e saj.
Pse ishte dënuar me vdekje
Pike ishte planifikuar të ekzekutohej për vrasjen e Colleen Slemmer në vitin 1995, kur ajo ishte 18 vjeç.
I dashuri i atëhershëm i Pike, Tandaryl Ship, dhe një tjetër vajzë e re, Shadolla Peterson, e çuan Slemmer në një zonë pyjore në Knoxville, ku e torturuan dhe e vranë.
Nga të tre, vetëm Pike u përball me një akuzë që mund të çonte në dënim me vdekje. Ship ishte 17 vjeç në atë kohë dhe nuk mund të dënohej me vdekje. Ai u dënua me burgim të përjetshëm dhe tashmë ka të drejtë të kërkojë lirimin me kusht. Peterson dëshmoi kundër dy të tjerëve dhe u dënua me pezullim të dënimit.
Në vitin 2001, ndërsa ndodhej tashmë në burg, Pike u dënua edhe për tentativë vrasjeje të shkallës së parë, pas një sulmi ndaj një bashkëburgosure.
Çështja e saj kishte tërhequr vëmendje ndërkombëtare, pasi ajo do të ishte gruaja e parë që do të ekzekutohej në Tenesi pas më shumë se 200 vitesh.
Organizatat kundër dënimit me vdekje dhe mbështetësit e Pike kishin kërkuar që dënimi i saj të ndryshohej, duke iu referuar moshës së saj në kohën e krimit, si dhe të dhënave për abuzim fizik dhe seksual që kishte përjetuar gjatë fëmijërisë.
Çfarë ndodhi gjatë ekzekutimit
Më 30 shtator, sipas dokumenteve të depozituara nga avokatët e saj, asaj iu administruan dy doza ilaçesh vdekjeprurëse përmes injeksionit, megjithatë ajo vazhdoi të merrte frymë për gati një orë. Autoritetet përfundimisht ndërprenë procedurën dhe nisën t’i ofronin ndihmë urgjente mjekësore.
Dëshmitarët e pranishëm thanë se Pike vazhdonte të fliste, të merrte frymë dhe të gërhiste edhe pas administrimit të substancave.
Avokati i saj deklaroi se personat përgjegjës u përpoqën për rreth një orë të gjenin një venë, duke përdorur të paktën shtatë gjilpëra vetëm në krahun e saj të majtë. Pas administrimit të dytë të ilaçit, sipas tij, krahu i saj filloi të merrte ngjyrë vjollcë.
Më pas, të pranishmëve iu kërkua të largoheshin pa e ditur nëse Pike ishte ende gjallë.
Dy ditë më vonë, avokatët e saj deklaruan në një dokument gjyqësor se ajo ndodhej në gjendje kritike në një spital të zonës së Nashville, ku mjekët po përpiqeshin të largonin pentobarbitalin nga organizmi i saj.
Sipas të njëjtit dokument, kur mbërriti në spital, të dy krahët e saj ishin “të enjtur, me djegie dhe të mbushur me flluska”.
Të martën, ekipi i saj ligjor njoftoi se Pike tashmë ishte e vetëdijshme për ambientin dhe fliste, duke sqaruar megjithatë se gjendja e saj shëndetësore mbetet e pasigurt dhe se pritet një periudhë e gjatë rehabilitimi.
Qendra për Informacionin mbi Dënimin me Vdekje (Death Penalty Information Center) deklaroi se ky është rasti i parë i njohur i një personi që ka mbijetuar pasi i janë administruar doza vdekjeprurëse ilaçesh në kuadër të një ekzekutimi.
Çfarë është pentobarbitali?
Protokolli i injektimit vdekjeprurës në Tenesi parashikon përdorimin e pentobarbitalit, një barbiturat që vepron në sistemin nervor qendror.
Substanca është miratuar nga Administrata Amerikane e Ushqimit dhe Barnave (FDA) për përdorime mjekësore, ndër të tjera për trajtimin afatshkurtër të pagjumësisë, krizave epileptike dhe si medikament para anestezisë gjatë ndërhyrjeve kirurgjikale.
Megjithatë, FDA nuk rregullon përdorimin e barnave kur ato përdoren për ekzekutime.
Avokatët e Pike kishin kundërshtuar protokollin e procedurës, duke argumentuar se një çrregullim i gjakut dhe venat e saj të vogla rrisnin rrezikun e komplikimeve, dhimbjes dhe gjakderdhjes. Ata kishin kërkuar gjithashtu shqyrtimin e metodave alternative, si skuadra e pushkatimit ose varja.
Nga ana tjetër, sistemi korrektues i Tenesit kishte argumentuar se protokolli i përcaktuar ishte respektuar dhe se kjo metodë ishte përdorur me sukses edhe në të kaluarën.
Çfarë ndodh më tej?
Pasojat e ekzekutimit të dështuar në gjendjen shëndetësore të 50-vjeçares mbeten të panjohura.
Ajo vazhdon të marrë trajtim mjekësor dhe, sipas avokatëve të saj, qëndron e lidhur me pranga dhe zinxhirë në shtratin e spitalit.
Avokatët e saj kanë deklaruar se do të vazhdojnë t'i kërkojnë guvernatorit të Tenesit, Bill Lee, që ta ndryshojë dënimin me vdekje në burgim të përjetshëm pa mundësi lirimi.
Lee ka pezulluar tashmë të gjitha ekzekutimet e planifikuara deri në fund të vitit 2026 dhe ka urdhëruar një hetim për atë që ndodhi në rastin e Pike.
Çështja erdhi pas një tjetër ekzekutimi të dështuar në maj, atë të Tony Carathers, i cili u anulua pasi autoritetet nuk arritën të vendosnin një linjë të dytë intravenoze. Carathers iu dha një shtyrje prej një viti.
Avokatët e Pike pretendojnë se gjatë procedurës nuk u respektua protokolli i shkruar i Tenesit dhe se pati neglizhencë në lidhje me praktikat bazë mjekësore.
Sipas tyre, ekipi i ekzekutimit nuk e kuptoi në kohë se gjilpërat nuk ishin vendosur siç duhet në venat e saj dhe se një pjesë ose e gjithë pentobarbitali mund të ishte injektuar në indet e trupit, në vend që të kalonte drejtpërdrejt në qarkullimin e gjakut.
Organizatat që kundërshtojnë dënimin me vdekje kërkojnë tashmë që të bëhen publike rezultatet e hetimit të urdhëruar për ekzekutimin e dështuar. /PiranjatNews/
