Flakët kanë përfshirë sërish zonat rurale të Peqinit, këtë herë në fshatin Haspiraj, ku zjarri ka djegur një sipërfaqe me shkurre, pyje dhe ullishte.
Situata është konstatuar gjatë orëve të pasdites, ndërsa ndërhyrja e forcave zjarrfikëse ka zgjatur rreth tre orë. Pas punës për izolimin e vatrës, flakët janë vënë nën kontroll dhe më pas janë shuar plotësisht.
Ngjarja vjen në një periudhë kur disa fshatra të Peqinit janë përballur me vatra zjarri të njëpasnjëshme. Dyshimet e ngritura për zjarrvënie të qëllimshme kanë shtuar shqetësimin për përhapjen e flakëve në zonat me bimësi dhe sipërfaqe bujqësore.
