SHBA dhe Libani mbrojnë një ish-gjeneral sirian të kërkuar për krime kundër njerëzimit

Bassam al-Hassan, ish-këshilltar i lartë i presidentit Bashar al-Assad, thuhet se është strehuar në Liban pas rënies së regjimit të Assadit në vitin 2024.

Sipas hetimit të përbashkët të BBC-së dhe transmetuesit amerikan NPR, Hassan është lejuar të qëndrojë në Liban në kuadër të një marrëveshjeje ku përfshihen FBI-ja, si dhe autoritete të tjera amerikane dhe libaneze. Shkak për këtë marrëveshje besohet të jetë gatishmëria e tij për të dhënë informacion mbi zhdukjen e gazetarit amerikan Austin Tice, i rrëmbyer në Siri në vitin 2012, si dhe informacione të tjera të inteligjencës.

BBC raportoi muajin e kaluar se rrëmbimi i Tice ishte një operacion i planifikuar dhe se Hassan kishte qenë pjesë e zinxhirit komandues.

Zyrtarë nga dy institucione të ndryshme të qeverisë së re siriane i kanë thënë BBC-së se duan që Hassan të kthehet në Siri për t’u përballur me drejtësinë. Sipas tyre, autoritetet amerikane kërkojnë që ai të qëndrojë në Liban dhe Damasku ka pak mundësi për ta ndryshuar këtë situatë.

BBC kërkoi koment nga FBI-ja, CIA dhe Drejtoria e Përgjithshme e Sigurisë së Përgjithshme të Libanit. Vetëm FBI-ja u përgjigj, duke refuzuar të komentojë konkretisht gjetjet dhe duke iu referuar një deklarate të mëparshme ku thuhet se fokusi i saj mbetet zbardhja e fatit të Tice dhe sigurimi i kthimit të tij.

Sipas dokumenteve të shqyrtuara nga BBC, gjatë një takimi mes Hassan, përfaqësuesve të FBI-së dhe CIA-s dhe zyrtarëve libanezë, atij iu ofruan “rezidencë”, “mbrojtje” dhe ndihmë për nevojat e jetesës në këmbim të informacionit, kryesisht për rastin e Tice.

Burime të njohura me marrëveshjen thanë se Hassan merr para nga autoritetet amerikane përmes një ndërmjetësi, gjë që e bën më të vështirë gjurmimin e pagesave. Hassan është gjithashtu nën sanksione të qeverisë amerikane.

Hassan u ka thënë hetuesve amerikanë se Austin Tice ishte ekzekutuar me urdhër të ish-presidentit Bashar al-Assad. Megjithatë, disa persona të njohur me hetimin kanë vënë në pikëpyetje detajet e dëshmisë së tij.

Hassan ka dhënë gjithashtu një vend të mundshëm ku mund të ndodheshin eshtrat e Tice. Por, sipas burimeve të cituara nga BBC, kërkimet në atë zonë nuk sollën rezultate, duke ngritur dyshime mbi saktësinë e disa prej informacioneve të tij.

Dy burime kanë pretenduar se autoritetet amerikane ndërprenë gërmimet para përfundimit të kërkimit, ndoshta për shkak të shqetësimeve të sigurisë.

Phil Elwood, zëdhënës i familjes së Austin Tice, e cilësoi situatën si shqetësuese, duke thënë se nëse informacionet janë të sakta, është e papranueshme që paratë e taksapaguesve amerikanë të përdoren për të financuar jetën e një personi të lidhur me përdorimin e armëve kimike kundër civilëve sirianë.

Hetimi i BBC-së sugjeron se Hassan nuk është i vetmi ish-zyrtar i regjimit sirian i lidhur me çështjen e Tice që ka përfituar nga pagesa ose ndihma për të jetuar jashtë vendit.

Një ish-anëtar i regjimit ka pretenduar se ka marrë disa herë pagesa nga FBI-ja në këmbim të bashkëpunimit në rastin Tice. Një tjetër ish-zyrtar, i lidhur me çështjen, tha se jeton në Liban nën “patronazhin” e autoriteteve amerikane.

Ndërkohë, disa persona të tjerë të lidhur me rrëmbimin e gazetarit amerikan besohet se ndodhen në Liban ose Emiratet e Bashkuara Arabe.

Austin Tice, ish-marins amerikan dhe gazetar i pavarur, u rrëmbye në Damask në gusht 2012. Fati dhe vendndodhja e tij mbeten ende të pazbardhura.

Top Channel