Përballja shumë e shumëpritur mes Tyson Fury-t dhe Anthony Joshua-s, në Cardiff, mund të nisë më herët nga sa ishte parashikuar fillimisht. Dy ish-kampionët e botës në peshat e rënda do të përballen më 11 dhjetor, në Principality Stadium, ndërsa dueli pritet të zhvillohet në orët e para të 12 dhjetorit.

Fillimisht ishte raportuar se hyrja e dy boksierëve në ring do të bëhej rreth orës 02:00 sipas orës britanike, në një orar të përshtatur edhe për audiencën e madhe të Netflix në Amerikën e Veriut.

Megjithatë, një kërkesë e paraqitur nga Millennium Stadium PLC tek Këshilli Bashkiak i Cardiff-it sugjeron se organizatorët synojnë që “ringwalk”-u i Fury-t dhe Joshua-s të nisë në 01:00.

Dokumenti i dorëzuar autoriteteve kërkon gjithashtu që stadiumi të lejohet të shesë pije deri në orën 03:00 dhe të qëndrojë i hapur deri në 03:30. Organizatorët kanë kërkuar edhe zgjatjen e orarit për aktivitetet muzikore gjatë eventit.

Një zëdhënës i këshillit të Cardiff-it konfirmoi se kërkesa lidhet me duelin Fury–Joshua dhe se “ringwalk”-u është planifikuar të nisë në orën 01:00.

Edhe Eddie Hearn, promotori i Joshua-s, kishte lënë të kuptohej më herët se përballja mund të zhvillohej rreth kësaj ore. Ai kishte përmendur si shembull duelin e Joe Calzaghe ndaj Mikkel Kessler në të njëjtin stadium në vitin 2007.

Sipas Hearn, vendimi përfundimtar i takon Netflix dhe Turki Alalshikh, ndërsa ora e hyrjes në ring mund të jetë 01:00 ose 01:30, pa përjashtuar mundësinë që të shtyhet deri në 02:00.

Fury dhe Joshua do të përballen më në fund pas një pritjeje shumëvjeçare, në një duel që ka marrë vëmendjen e madhe të tifozëve të boksit në Britani dhe më gjerë. Përballja do të zhvillohet të premten në mbrëmje, ndërsa Cardiff-i pritet të jetë në qendër të vëmendjes sportive.