Mane Driza, i njohur me nofkën “Tony Montana”, pritet të transferohet në Shqipëri për të vuajtur pjesën e mbetur të dënimeve, pasi është dënuar për vrasjen e pesë personave në tre shtete të ndryshme.
48-vjeçari e nisi serinë e krimeve në Shqipëri, vijoi në Mbretërinë e Bashkuar dhe më pas në Itali. Në moshën 18-vjeçare, Driza vrau dy persona në Shqipëri, ndërsa më vonë u largua drejt Britanisë së Madhe me identitet të rremë.
Në vitin 1999, ai vrau në Britani shqiptarin Stefan Mone, ndërsa disa muaj më vonë u largua drejt Italisë. Atje vrau me armë dy persona, Artan Maskajn dhe Albert Blushajn, ndërsa tentoi të vriste edhe një person të tretë.
Driza është dënuar me 25 vite burg në Shqipëri, 30 vite në Itali dhe 20 vite në Mbretërinë e Bashkuar. Në vitin 2023, Shqipëria dhe Britania e Madhe arritën një marrëveshje për transferimin e të dënuarve shqiptarë, ku përfshihet edhe Driza.
Sipas raportimeve, ai pritet të transferohet në Shqipëri për të vuajtur pjesën e mbetur të dënimeve të dhëna nga autoritetet britanike dhe shqiptare.
