Zyrtarë të lartë rusë dhe amerikanë, përfshirë të dërguarin special të SHBA-së Jared Kushner, kanë zhvilluar bisedime rreth sjelljes së një investitori amerikan në tubacionet Nord Stream që furnizonin me gaz Gjermaninë përpara se Rusia të pushtonte Ukrainën, thanë pesë burime me njohuri për situatën. Diskutimet përfshinin Kirill Dmitriev, një këshilltar të ngushtë të Presidentit rus Vladimir Putin, dhe Jared Kushner, dhëndrin e Presidentit amerikan Donald Trump, thanë burimet. Kushner, i cili është përpjekur të ndërmjetësojë një armëpushim midis Rusisë dhe Ukrainës, e sheh bërjen e biznesit si thelbësore për rivendosjen e paqes. Një marrëveshje e tillë do t'u mundësonte investitorëve amerikanë të përfitonin nga rrjedhat e energjisë në Evropë sapo të mbarojë lufta. Dmitriev dhe Kushner janë takuar në Moskë dhe Nju Jork javët e fundit. Ndërsa nuk ishte e qartë se në çfarë mase diskutuan për Nord Stream në ato raste, tema mbetet në axhendë, thanë dy nga burimet për Reuters. "Çdo marrëveshje do të duhet të negociohet nga Rusia me DFC (Korporata Financiare Ndërkombëtare e Zhvillimit të SHBA-së) dhe Thesarin dhe prej saj duhet të përfitojnë taksapaguesit dhe kompanitë amerikane", tha një zyrtar i Shtëpisë së Bardhë. Sidoqoftë ai pranoi se nuk ka patur diskutime kohët e fundit për Nord Stream. Dmitriev, i cili ka lobuar për rifillimin e shitjeve të gazit rus në Gjermani, u takua muajin e kaluar me përfaqësues të Departamentit të Energjisë dhe Thesarit të SHBA-së për të diskutuar iniciativat e mundshme energjetike SHBA-Rusi. Mbetet e paqartë se sa i interesuar është Uashingtoni në ndjekjen e rifillimit të rrjedhave të gazit rus në Gjermani, e cila është konsumatori më i madh i energjisë në Evropë.