Zegjine Çaushi replikon me Baçin: Mos bëj sikur të qan shpirti për fierakët, njësoj si Gaz Bardhi

Këtë të enjte po zhvillohen një sërë debatesh mes deputetëve, ndërsa në Kuvend po mbahet seanca e radhës plenare, me fokus te projektligji për ndryshimet administrativo-territoriale. 

Një prej tyre ishte edhe replika mes deputetes socialiste Zegjine Çaushi dhe deputetit demokrat Luan Baçi.

Çaushi kërkoi që Baçi të mos përdorë politikën kundër interesit të qytetarëve të Fierit, qark që ai përfaqëson, duke ironizuar edhe interesin për zonën nga kreu i Grupit Parlamentar, Gazment Bardhi.

Replikat mes tyre u pritën me humor nga deputetët e pranishëm në sallë.

“Zoti Baçi lëri retorikat politike se i ke ngopur fierakët në kaq vite, ti edhe kolegët e tu. Prandaj mos hajde këtu dhe të bësh sikur po të qan shpirti për ta. Aman. Lërja kryetarit të Grupit se ai i ka më me merak fierakët”,-tha Çaushi./CNA