Shkrimtarja kanadeze Anne Carson fiton Nobel-in në Letërsi për vitin 2026

Poetja dhe eseistja kanadeze Anne Carson fitoi Çmimin Nobel në Letërsi të enjten. Ajo u vlerësua për veprën e saj të guximshme dhe novatore, e cila, përmes një dialogu krijues me traditën klasike, ka krijuar forma të reja për letërsinë bashkëkohore”.

Ingrid Carlberg, sekretarja e përhershme e Akademisë Suedeze, tha se autorja ndodhej në Islandë, “duke dëgjuar erën”, kur Akademia e kontaktoi për ta njoftuar se kishte fituar çmimin.

Carson, e lindur në Toronto, mbështetet në tema dhe histori nga letërsia e lashtë greke dhe romake për të krijuar vepra që shpesh ndërthurin elemente të poezisë, esesë dhe prozës artistike.

Ndër librat e saj përfshihen Eros the Bittersweet, një vepër që shqyrton kënaqësinë dhe dhimbjen e dëshirës në letërsinë e lashtë greke; romani në vargje Autobiography of Red; Men in the Off Hours, një përmbledhje poezish dhe prozash që fitoi Çmimin Griffin për Poezinë në Kanada në vitin 2001; si dhe Norma Jeane Baker of Troy, një vepër që krahason Marilyn Monroe me Helenën e Trojës.

Vitin e kaluar, shkrimtari hungarez László Krasznahorkai, romanet surrealiste dhe anarkike të të cilit ndërthurin një këndvështrim të zymtë mbi botën me humor therës, fitoi Çmimin Nobel në Letërsi. Sipas jurisë, vepra e tij mbron fuqinë e artit në mes të «terrorit apokaliptik».

Tre çmime Nobel në fushën e shkencës u shpallën më herët gjatë kësaj jave.

Çmimi Nobel në Mjekësi iu dha tre shkencëtarëve, puna e të cilëve çoi në zhvillimin e një metode që përdor dritën për të ndihmuar në zbulimin e mënyrës se si funksionon truri.

Çmimi Nobel në Fizikë vlerësoi përpjekjet e një shkencëtari për të zbuluar misteret e një grupi të rrallë neutrinosh.

Ndërsa Çmimi Nobel në Kimi iu dha dy shkencëtarëve për zbërthimin e misterit të molekulave që janë imazhe pasqyrë të njëra-tjetrës, një zbulim që është përdorur në zhvillimin e një numri të madh ilaçesh.

Java e ndarjes së çmimeve do të përfundojë të premten me shpalljen e Çmimit Nobel për Paqen. Çmimi Nobel në Shkencat Ekonomike do të shpallet të hënën.

Shuma monetare e çmimit këtë vit është 12 milionë korona suedeze (rreth 1,2 milionë dollarë), pavarësisht nëse fituesi është një individ, një grup i vogël laureatësh apo një organizatë.