Nga ultimatumi i Ramës te protestat para Kuvendit/ Kronologjia e përplasjeve për “Territorialen”

Duhet të dëgjoni zërin e qytetarëve që protestojnë dhe ato qytetarëve nga zonat tuaja elektorale që ju kërkojnë të mos votoni hartën. Është e papranueshme që ne rrimë këtu brenda për të përmbushur detyrën tonë , ndërsa qytetarët pengohen në ushtrimin e të drejtës Kushtetuese.

Kur dëgjova Ballën se tha mbështesim Prokurorinë e Posaçme, por duhet të kujtojë kur i dolët kundër SPAK për të mbrojtur një të korruptuar ku e sollët zvarrë nga palestra për të votuar reformën Territoriale, Mos i dil për zot vilave të Belindës, nga Dhërmiu, në Itali e Vjenë.

Mos na bëj leksione këtu. Ju jeni palë, por shumë nga kolegë tanë nuk  janë palë, sepse nuk janë ekipi i Ergys Agasit… T’i the nuk mund të kërkojmë llogari për këtë çështje sepse jemi palë, por Kuvendi i Shqipërisë dhe shumica nuk janë palë. Kjo është interpelanca e 11 që refuzoni të sillni këtu Kryeministrin e Shqipërisë. Është një turp”, tha ndër të tjera Bardhi.

Deputetja socialiste Elisa Spiropali ka replikuar me Gazmend Bardhi, ku deklaroi ndër të tjera lidhur me ultimatumin e Ramës, se nuk mund të shantazhohet nga askush, ndërsa kundërshtoi pretendimin e Bardhit se përfaqëson zërin e qytetarëve.

“Të jesh i sigurt, Gaz Bardhi, nuk ka njeri këtu që të më shantazhojë mua. E kam kërkuar… S’je ti zëri i qytetarëve që pretendon. Por nuk më shantazhojnë dot as ata që të shantazhuan ty, të gjithë deputetët dhe ata që kishe drejtues të PD-së në Fier. As ata nuk më shantazhojnë dot, se do të shkojnë aty ku e kanë vendin.

 Nuk mund të përdoret këtu çdo platformë për të folur për të njëjtën çështje. I qëndroj një më një gjërave që kam thënë, në platformë dhe pa platformë, e kam prezantuar në Asamblenë e PS-së.

Ashtu sikur ju nuk thoni dot një fjalë në parti. Ju nuk keni një parti, por një njeri. I kam dalë kundër kulturës së personalizimit të pushtetit në një dorë, nga pushteti lokal te ai qendror. Ju jeni mishërimi i pushtetit deri në katandisje. I kam dalë kundër kësaj kulture. Mos i lidh çështjet që janë të palidhura, se do të zgjidhen shumë shpejt.”, tha ajo.

Deputetja demokrate Ina Zhupa i kërkoi Vullnet Sinajt që të votojë kundër draftit të PS për reformën territoriale dhe ti qëndrojë deklaratave të tij kundër shkrirjes së bashkisë së Selenicës.

“A ka Vullnet Sinaj t’i qëndrojë asaj që ka thënë më 3 gusht, që Selenica nuk duhet të shkrihet? A ke vullnet të tregohesh burrë nga Vlora dhe t’i qëndrosh fjalës që u ke dhënë qytetarëve? Po injoroni 15 këshilla bashkiakë që kanë votuar kundër.

Po përplaseni me qytetarët jashtë kësaj salle, të cilët ju kërkojnë t’i dëgjoni. Ju keni marrë urdhër të qëndroni si ushtarë për të votuar Ramaformën. Tërhiquni, nuk e hoqët nga rendi i ditës po keni mundëis të votoni kundër”, tha Zhupa.

Edhe deputetja e Partisë Demokratike, Jorida Tabaku, kundërshtoi në Kuvend avancimin e Reformës Territoriale, duke paralajmëruar deputetët e mazhorancës se vota pro ndryshimeve do t’i vendoste, sipas saj, në atë që e cilësoi si “listën e turpit”.

Tabaku akuzoi mazhorancën se po ndërmerr një reformë pa dëgjuar qytetarët dhe komunitetet që preken prej saj. Ajo veçoi Tiranën, duke theksuar se një e treta e popullsisë së vendit, sipas saj, nuk është dëgjuar gjatë procesit.

Sipas deputetes demokrate, ndryshimet nuk përbëjnë një reformë të mirëfilltë administrative, por një ndërhyrje me karakter politik, elektoral dhe ekonomik.

Një tjetër përplasje u regjistrua mes Blendi Klosit dhe Sali Berishës.

Klosi u shpreh i bindur se reforma territoriale do të votohet dhe i kërkoi opozitës të zhvillojnë një seancë parlamentare të rregullt.

“Jemi më të fortë se kurrë, të gatshëm t’ju sfidojmë se nga të gjitha bashkitë që do të dalin nga ligji sotëm, të merrni më pak se gishtat e dorës bashki në zgjedhje. Nëse nuk bëjmë gabime, të gjitha bashkitë që do të dalin nga ligji i sotëm do t’i fitojmë.

Jemi këtu për tu përballur me argumenta, sepse mendojmë se bashkimi i bën bashkitë më të forta dhe u shërbehet më mirë qytetarëve. Le të hyjmë në diskutim të rregullt parlamentar. Mos bëni rrëmujë. Ose diskutoni, ose shkoni protestoni. Nuk keni asnjë shpresë, reforma do të votohet”, u shpreh Klosi.

Përgjigja e Berishës ishte: “Një njeri që ia ka blerë bixhozi votën, nuk meriton asnjë përgjigje. Është skllav i vesit të tij. Ndaj ftoj shqiptarët të shumëzojnë me zero diskutimin që bëri”.

Protesta jashtë Kuvendit dhe përplasjet me policinë

Paralelisht me seancën plenare është zhvilluar edhe protesta jashtë parlamentit. Që në orët e para të mëngjesit, Policia e Shtetit vendosi masa të shtuara sigurie rreth Kuvendit. Efektivët u pozicionuan nga Xhamia e Namazgjasë përgjatë Rrugës së Elbasanit deri te Ministria e Brendshme. Në zonë u vendosën gardhe metalike, automjete policie dhe autobotë.

Protesta u zhvillua nga opozita dhe qytetarë që kundërshtojnë reformën territoriale. Në zonën përpara Kuvendit u mblodhën edhe protestues të grupit të “flamingove”.

Pak momente nga nisja e protestës filluan dhe tensionet mes protestuesve dhe policisë. Protestuesit kundërshtuan kordonin e sigurisë dhe kërkuan të qëndronin në zonën përpara Kuvendit.

Më pas, protestuesit shtynë kordonin e policisë dhe tentuan të kalonin barrierat metalike. Policia ndërhyri për t’i zmbrapsur dhe përdori spraj lotsjellës.

Në zonën pranë Xhamisë së Namazgjasë u regjistrua përplasje mes Sali Lushajt dhe efektivëve të policisë. Lushaj ndodhej në krye të protestuesve të PD-së kur u përplas me policinë.

Një tjetër përplasje u regjistrua me kryetarin e Bashkisë Memaliaj, Albert Malaj. Malaj nuk iu bind urdhrit të policisë për të qëndruar jashtë rrethimit dhe më pas u përfshi në përplasje fizike me efektivët dhe disa prej shoqëruesve të tij.

Në protestë doli edhe deputeti demokrat Klevis Balliu. Ai iu drejtua efektivëve dhe kërkoi që të hapnin rrugën për protestuesit dhe të qëndronin brenda perimetrit të përcaktuar të sigurisë.

Në një tjetër pikë të protestës, qytetarët bllokuan qarkullimin në bulevardin “Zhan D’Ark”, në drejtim të Rrugës së Elbasanit. Efektivët u kërkuan protestuesve të lironin rrugën, ndërsa më pas përdorën spray djegës.

Në protestë ishin edhe banorë të bashkive që parashikohet të shkrihen sipas draftit të PS-së, mes tyre Memaliaj dhe Fushë-Arrëzi. Protestuesit kundërshtuan shkrirjen e bashkive dhe kërkuan të mos votohej projektligji.

Për të sprapsur turmën efektivët përdorën sërish spray me piper ndaj protestuesve që tentonin të kalonin kordonin e sigurisë, ku si pasojë disa prej tyre pësuan lëndime serioze dhe përfunduan në spital.