BE kritikon ndryshimet në Ligjin për Dhomat e Specializuara të Kosovës: Bien ndesh me detyrimet ndërkombëtare

Bashkimi Evropian ka shprehur shqetësim të thellë lidhur me ndryshimet dhe plotësimet e miratuara nga Kuvendi i Kosovës në Ligjin për Dhomat e Specializuara të Kosovës.

Në një deklaratë zyrtare, BE-ja vlerëson se ndryshimet e miratuara bien ndesh me detyrimet ndërkombëtare të Kosovës ndaj Bashkimit Evropian dhe thekson rëndësinë e ruajtjes së pavarësisë së Dhomave të Specializuara.

“Ligji i miratuar nga Kuvendi i Kosovës që ndryshon dhe plotëson Ligjin për Dhomat e Specializuara bie ndesh me detyrimet ndërkombëtare të Kosovës ndaj BE-së”, thuhet në deklaratë.

Brukseli rikujton se ka mbështetur në mënyrë të vazhdueshme punën e Dhomave të Specializuara të Kosovës, të cilat i cilëson si një institucion gjyqësor të pavarur, të themeluar përmes vendimeve të Kuvendit të Kosovës në vitet 2014-2015.

Sipas BE-së, Dhomat e Specializuara veprojnë brenda sistemit ligjor të Kosovës dhe janë të sanksionuara në Kushtetutën e vendit. Për këtë arsye, Brukseli thekson se mandati dhe pavarësia e tyre duhet të respektohen plotësisht.

BE-ja nënvizon gjithashtu se Dhomat e Specializuara po japin drejtësi mbi bazën e parimit të përgjegjësisë penale individuale.

Në deklaratë, Bashkimi Evropian i bën thirrje Kosovës të respektojë detyrimet e saj ndërkombëtare dhe të garantojë pavarësinë gjyqësore të Dhomave të Specializuara, si dhe angazhimin për llogaridhënie dhe drejtësi për viktimat dhe familjet e tyre nga të gjitha komunitetet në Kosovë.

“Mbrojtja dhe siguria e dëshmitarëve duhet të sigurohet”, thekson BE-ja në përfundim të deklaratës.