Mazniku i përgjigjet PD-së: Propozimi për 100 bashki nuk ishte i mirë, nuk erdhët në mbledhje për 112 ditë

Bashkëkryetari i Komisionit të Posaçëm për Reformën Administrativo-Territoriale, Arbjan Mazniku, foli sot në Kuvend lidhur me përplasjet politike të krijuara nga diskutimet për projektligjin që pritet të votohet këtë të enjte.

Në fjalën e tij gjatë seancës plenare, Mazniku u shpreh se propozimi i PD-së për ndarjen e vendit në 100 bashki nuk ishte i mirë.

Mazniku u ndal te situata e bashkive të vendit pas reformës së viti 2014 dhe ndikimi që prodhoi në buxhet, borxhe dhe më gjerë.

Socialisti iu përgjigj pretendimeve të PD-së mbi punën për ndarjen e re territoriale duke kujtuar se iu shmangën mbledhjes së parë për më shumë se 3 muaj.

“Njerëzit nuk jetojnë në hartë, jetojnë në shtëpinë e tyre, ku duan që t'u shkojë rruga, uji. Njerëzit jetojnë në lagjen e tyre, që duan t'u pastrohet dhe t'u ndriçohet. Njerëzit jetojnë në fshatin e tyre, ku duan kanale kulluese e rrugë për arat. Jetojnë në qytete, ku duan që të ketë çerdhe, kopshte dhe transport publik. A ishte reforma e vitit 2014 një sukses? Në të gjitha dëgjesat, nga të gjitha diskutimet, po, reforma e vitit 2014 ishte sukses. Asnjë person i PD-së, asnjë person nuk tha: duam mbrapsht komunat. Ajo situatë, as propozimi i 100 bashkive, nuk tregon që ajo që kishim ishte mirë. Ajo që erdhi tregoi qartë se bashkitë u forcuan, të ardhurat u rritën, borxhetet u ulën, fuqia investuese e bashkive u rrit. Nuk erdhën të bënim mbledhjen e parë për 112 ditë. U dogj 41% e kohës dhe mandatit që komisioni kishte”,-tha Mazniku./CNA