Tensione dhe përplasje janë regjistruar gjatë protestës pranë Parlamentit, ku në pamjet e publikuara shihen efektivë policie dhe persona civilë duke shoqëruar me forcë disa qytetarë. Në video dallohen momente tensioni, teksa protestuesit përplasen me personat që po i largojnë nga zona e protestës.
Në një prej momenteve të filmuara, një efektiv policie shihet duke goditur me shkelma një person, i cili është futur në një automjet. Ndërsa në një tjetër moment, një qytetar rrethohet nga disa efektivë policie, ndërsa një person civil e shtyn me forcë në drejtim të makinës së policisë.
Përplasjet janë shënuar në kuadër të protestës kundër Reformës Administrativo-Territoriale, e cila është shoqëruar me tensione të vazhdueshme jashtë Parlamentit. Situata është monitoruar nga forca të shumta policie, ndërsa protesta ka vijuar paralelisht me zhvillimin e seancës plenare në Kuvend.
