“Vallja e Osman Takës”, një nga vallet më të njohura tradicionale shqiptare, është përfshirë në Listën Kombëtare të Trashëgimisë Kulturore Jomateriale të Shqipërisë.
Vallja lidhet me figurën legjendare të Osman Takës, patriotit nga Konispoli, dhe është përcjellë ndër breza si një nga shprehjet më të spikatura të traditës së trevës së Çamërisë. Historia e saj është shoqëruar ndër vite me rrëfimin për Osman Takën, i cili, sipas traditës gojore, kërceu vallen para se të ekzekutohej, duke mahnitur të pranishmit dhe duke shpëtuar jetën.
“Vallja e Osman Takës” është karakteristike për lëvizjet e fuqishme dhe interpretimin elegant të valltarit, ndërsa është bërë pjesë e repertorit të grupeve dhe ansambleve folklorike shqiptare brenda dhe jashtë vendit.
Regjistri Kombëtar i Trashëgimisë Kulturore Jomateriale përfshin elemente të ndryshme të kulturës shqiptare, mes tyre këngët, vallet, meloditë, legjendat, traditat, ritualet, artizanatin dhe praktikat e tjera të transmetuara brez pas brezi.
Përfshirja në këtë listë synon dokumentimin, ruajtjen dhe transmetimin e mëtejshëm të kësaj tradite, në mënyrë që ajo të vijojë të jetë pjesë e gjallë e trashëgimisë kulturore shqiptare.